मेगा बैंकको एटीएम मेशिन ह्याक गर्न खोज्ने चिनियाँ नागरिक पक्राउ

१८ चैत, काठमाडौं । नेपाल प्रहरीले ठमेल ज्याठास्थित मेगा बैंकको एटीएम मेशिन ह्याक गरी पैसा निकाल्न खोज्ने एक चिनियाँ नागरिकलाई पक्राउ गरेको छ ।

विभिन्न बैंकको एटीएम बुथमा अस्वाभाविक रूपमा कुनै व्यक्तिले रकम निकाल्न लागेको भन्ने विशेष सूचनाका आधारमा मंगलवार साँझ खटिएको प्रहरी टोलीले वाङ सियाओलोङ नाम गरेका २९ वर्षीय व्यक्तिलाई पक्राउ गरेको हो ।

उनले एटीएम मशिनको किबोर्ड पिन ह्याक गरी नगद निकाल्न प्रयास गरेको प्रहरीले जनाएको छ । पक्राउ परेका चिनियाँ नागरिकलाई प्रहरीले बुधवार सार्वजनिक गरेको हो ।

उनको साथबाट १० वटा चाबीको एक झुप्पा, १० वटा एटीएम कार्ड, एप्पलको म्याकबूक, चाइनिङ पासपोर्ट लगायत बरामद गरिएको प्रहरीले जनाएको छ ।