ओली समस्या, म समाधानः नेपाल

१८ चैत, काठमाडाैं । नेकपा एमालेबाट निलम्बित वरिष्ठ नेता माधवकुमार नेपालले पार्टी अध्यक्षसमेत रहेका प्रधानमन्त्री केपी ओली नेकपाको समस्या मात्र भएको बताएका छन् । आफू निकट राष्ट्रिय युवा संघको एक कार्यक्रमलाई संवोधन गरी बाहिरिने क्रममा नेता नेपालले भने एमाले भित्र ओली समस्या हुन् भने माधव नेपाल समाधान हो ।

आफूमाथि गरिएको कारबाही नक्कली भएको उनको दाबी छ । असली एमालेले मलाई कारबाही गर्ने ठाउँ छैन, मन्त्री खान आएकाहरुको फौजबाट यस्तो काम भएको छ – उनले भने । यो भन्दा हाँस्यास्पद निर्णय के हुन सक्छ ? उनको प्रश्न छ । देशै भरिका असली एमालेको भावना बोकेर आफू अगाडि बढ्ने भन्दै नेता नेपालले भने–अझै पनि ओलीलाई सच्चिने अन्तिम मौका दिन्छौं । सुध्रिएनन् भने उनलाई ठेगान लगाउन कुनै गाह्रो छैन ।

फागुन २८ को अवैधानिक निर्णय सच्याउने हो भने अझै एमाले एकतावद्ध हुन सक्छ नत्र के हुने हो भन्न सकिन्न– उनले भने । अब नयाँ पार्टी बनाउनु हुन्छ त ? भन्ने सञ्चारकर्मीको प्रश्नमा उनले भने – असली एमालेलाई निकालेर सडकमा पु¥याउन खोजियो भने त्यसको परिणाम के होला?त्यो त स्वयं ओलीले बुझ्ने हो ।

आफूहरु देशैभरका कार्यकर्ताको सम्पर्कमा रहेकाले उनीहरुको चाहना र भावना बमोजिम अगाडि बढ्ने नेता नेपालले बताए । फागुन २३ को सर्वाेच्च अदालतको निर्णय राजनीतिक प्रकृत्तिको भएकाले आफूहरुको असहमति रहेपनि अस्वीकार भने नगर्ने भन्दै त्यही फैसलाको मर्म र भावना अनुरुप चल्न आफू तयार रहेको पनि उनले प्रष्ट्याए ।

अदालतले २ जेठ , २०७५ मा फर्कन भनेकोमा फागुन २८ को निर्णय नै प्रमुख वाधक भएकाले सोही बमोजिम अगाडि बढ्न तयार रहेको तर ओलीले नमानेकाले समस्या आएको नेता नेपालले बताए । एमाले भन्ने पार्टी निर्माणमा ओलीको कुनै भूमिका नरहेको दावी गर्दै नेता नेपालले ढोडको तोक्मा लगाएर कारबाहीको नाटक गर्नुको कुनै औचित्य नरहेको प्रष्ट पारे ।