अष्ट्रेलियाका बलर जोसले आईपीएल नखेल्ने

१९ चैत, एजेन्सी । अष्ट्रेलियाका बलर जोस हाजलउड १४ औं संस्करणको इन्डियन प्रिमियर लिग ‘आईपीएल’ टी-ट्वान्टी क्रिकेट नखेल्ने भएका छन् । चेन्नई सुपर किङ्समा आबद्द हाजलउडले टिमबाट नाम फिर्ता लिएका छन् ।

अष्ट्रेलियाको आगामी क्यालेन्डरका लागि तयार रहन उनले आईपीएलबाट नाम फिर्ता लिएको बताईएको छ । ३० वर्षीय फास्ट बलर हाजलउड आईपीएलबाट नाम फिर्ता लिने तेस्रो खेलाडी हुन् । यस अघि जोस फिलिप र मिचेल मार्शले नाम फिर्ता लिईसकेका छन् ।

१४ औं संस्करणको प्रतियोगिता अप्रिल ९ बाट सुरु हुनेछ । प्रतियोगिताको फाइनल खेल मे ३० मा हुनेछ । चेन्नईमा हुने उद्घाटन खेलमा मुम्बई इन्डियन्स र रोयल च्यालेन्जर्स बैंगलोर भिड्ने छन् ।

आईपीएलका लागि अक्सन सम्पन्न भईसकेको छ । कोरोनाको महामारी बाबजुत १३ औं संस्करणको आईपीएल भने युएईमा आयोजना भएको थियो । फाइनलमा दिल्लीलाई हराएर मुम्बईले उपाधि जितेको थियो ।