विराटनगर महानगरपालिकाले दोहोरो भत्ता रोक्यो

२० चैत, काठमाडौं । अख्तियार दुरुपयोग अनुसन्धान आयोगको निर्देशनपछि विराटनगर महानगरपालिकाले दोहोरो भत्तामा  वितरण रोकेको छ ।  विराटनगर महानगरपालिकाले दोहोरो भत्ता लिदै आएका २ सय ७६ जना जेष्ठ नागरिक र एकल महिलाको भत्ता रोकेको छ ।

सामाजिक सुरक्षा ऐन २०७५ को दफा १५ मा निवृत्तिभरण वा नियमित पारिश्रमिक लिनेहरुले सामाजिक सुरक्षा भत्ता लिन नपाइने व्यवस्था भएपनि विराटनगर महानगरपालिका लगायत धेरै स्थानीय तहहरुले दोहोरो सुविधा दिदै आएका थिए ।

विराटनगर महानगरपालिकाबाट चालू आर्थिक वर्ष पहिलो चौमासिकमा सामाजिक सुरक्षा भत्तावापत १४ हजार ८३ जनालाई १३ करोड ४३ लाख ८३ हजार रुपैया वितरण गरेको थियो भने दोश्रो चौमासिकमा १४ हजार २ सय ३१ जनालाई १३ करोड ५१ लाख ८४ हजार रुपैया वितरण गरेकेा थियो ।