मानहानी मुद्धाको पेशी चढ्यो, सुनुवाई हुन पाएन

२० चैत, काठमाडौं । प्रधानमन्त्री केपी ओली र पूर्व चारजना प्रधानन्यायधीशविरुद्ध सर्वाेच्च अदालतमा परेको मानहानी मुद्धाको आज पेशी चढेपनि सुनुवाई भने हुन सकेन । न्यायधीशद्वय ईश्वरप्रसाद खतिवडा र हरिप्रसाद फुयाँल रहेको संयुक्त इजलाशमा पेशी चढेको थियो । तर मुद्धा हेर्न भने इजलाशले भ्याएन ।

प्रधानमन्त्री ओलीविरुद्ध माघ १३ गते सर्वाेच्चमा अधिवक्ताद्वय कञ्चनकृष्ण न्यौपाने र कुमार शर्मा आचार्यले मुद्धा दायर गरेका थिए । यस्तै सर्वाेच्च अदालतका चार जना पूर्व प्रधानन्यायधीशविरुद्ध राजाराम घिमिरेले मानहानी मुद्धा हालेका थिए । पूर्व प्रधानन्यायधीशहरु मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीविरुद्ध मुद्धा परेको थियो ।