पाँच सय रुपैयाँभन्दा बढि शेयरमूल्य भएका वाणिज्य बैंकहरु, प्रतिशेयरमूल्य कुनकाे कति ?

२० चैत, काठमाडौं । शेयरबजारमा दिनदिनै नेप्सेले नयाँ रेकर्ड कायम गरिरहेको छ । साताकाे अन्तिम कारोबार दिन नेप्से परिसूचक अहिलेसम्मकै उच्च विन्दू पुग्न सफल भएको हो ।  बिहीबार नेप्से परिसूचक २६ सय ३१ विन्दूमा पुगेको हो ।

हालसम्म नेप्से परिसूचक २६ सय ४० विन्दूको हाराहारीमा पुगेको छ । यतिबेला पुँजीबजारमा ठूलो संख्यामा आईपीओ भित्रिइरहँदा लगानीकर्ता पनि बढिरहेका छन्, जसले गर्दा सामान्य लगानीकर्ताको भीड प्राथमिक बजारमा मात्र नभएर दोस्रो बजारमा पनि उल्लेख्य देखिन्छ ।

पछिल्लो समय चन्द्रागिरी हिल्स, निफ्रा हुँदै सिंगटी हाईड्रोको आईपीओमा परेको आवेदनले लगानीकर्ताको बजारमा बढेको आकर्षणलाई आकलन गर्न सकिन्छ ।

यही भीडभाडमा सामान्य कम्पनीहरूको पनि शेयरमूल्य उचालिरहेका बेला वाणिज्य बैंकहरुको शेयरमूल्य भने खासै बढ्न सकेको छैन् । केही यस्ता कम्पनीहरू अझै पनि छन्, जुन अझै तपाईंले दोस्रो बजारमा अण्डरभ्यालुड मूल्यमा नै शेयर किन्न सक्नुहुन्छ ।

लामो समयदेखि कम शेयरमूल्य भएका तर लगानीकर्ताले राम्रो लाभांश पाउन सक्ने कम्पनीहरू छन् । तर, आज ५ सय रुपैयाँ बढि शेयरमूल्य भएका कम्पनीको बारेमा चर्चा गदैछौ। ५ सय रुपैयाँभन्दा बढि मूल्य रहेका वाणिज्य बैंकहरूको शेयरमूल्यलाई आधार मानेर यो रिपोर्ट तयार पारिएको छ ।

पाँच सय रुपैयाँभन्दा बढि शेयरमूल्य भएका वाणिज्य बैंकहरूः

नबिल बैंक

वाणिज्य बैंकहरुमध्येको सबैभन्दा उच्च शेयरमूल्य भएको बैंकको अग्रस्थानमा छ नबिल बैंक । बैंकको शेयरमूल्य हाल १२ सय ९४ रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष आवमा ३५ प्रतिशत लाभांश दिएको थियो ।

चालू आर्थिक वर्षको दोस्रो त्रैमाससम्म बैंकको मूनाफा भने घटेको थियो । बैंकले दोस्रो त्रैमासम्म २ अर्ब १ करोड रुपैयाँ मूनाफा आर्जन गरेको थियो । उक्त मुनाफा अघिल्लो आर्थिक वर्षको तुलनामा १.२६ प्रतिशत कम हो । गत आर्थिक वर्षको सोही अवधिसम्ममा बैंकले २ अर्ब ४ करोड मूनाफा कमाउन सफल भएकाे थियो।

एनआईसी एशिया बैंक

एनआईसी एशिया बैंक उच्च शेयरमूल्य भएको बैंकहरुमधेको दास्रो नम्बरमा पर्दछ । बैंकको शेयरमूल्य ९०३ रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष आवमा २० प्रतिशत लाभांश दिएको थियो ।

आर्थिक वर्षको दोस्रो त्रैमासमा बैंकको मूनाफा बढेको थियो । बैंकले दोस्रो त्रैमासम्म २ अर्ब ६ करोड रुपैयाँ मूनाफा आर्जन गरेको थियो।

एभरेष्ट बैंक

एभरेष्ट बैंक उच्च शेयरमूल्य भएको बैंकहरुमध्येको तेस्रो नम्बरमा पर्दछ । बैंकको शेयरमूल्य ७५५ रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष आवमा १० दशमलव ५३ प्रतिशत लाभांश दिएको थियो ।

स्टान्डर्ड चार्टर्ड बैंक

स्टान्डर्ड चार्टर्ड बैंक उच्च शेयरमूल्य भएको बैंकहरुमध्येको चौथो नम्बरमा पर्दछ । बैंकको शेयरमूल्य ६०१ रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष आवमा ११ दशमलव ८४ प्रतिशत लाभांश दिएको थियो ।

हिमालयन बैंक

हिमालयन बैंक उच्च शेयरमूल्य भएको बैंकहरुमध्येको पाँचौ नम्बरमा पर्दछ । बैंकको शेयरमूल्य ५०० रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष आवमा २० प्रतिशत लाभांश दिएको थियो ।

नेप्सेमा सूचीकृत २७ वाणिज्य बैंकहरुमध्येमा अधिकांश बैंकहरुको शेयरमल्य २ सय ९५ रुपैयाँदेखि ४ सय रुपैयाँको हाराहारीमा रहेको छ । अधिकांश बैंकहरुको शेयर बढ्न नसक्नुमा विज्ञहरूको आ–आफ्नै तर्क छ ।

यता इन्भेस्टर फोरमका अध्यक्ष तथा लगानीकर्ता छोटेलाल रौनियार भने बैंकहरूमा छोटो समयमा नाफा बुक गर्न नसक्ने भएर माग घट्दा शेयरमूल्य बढ्न नसकेको बताउँछन् ।

उनी भन्छन्, ‘बैंकमा लङटर्म प्रोफिट बुक गर्ने लगानीकर्ताहरूका लागि उपयुक्त हुन्छ । त्यसैले दोस्रो बजारमा खासै माग हुँदैन । लघुवित्तलगायतका अन्य कम्पनीहरूमा लगानी गरेको छोटो समयमा नै नाफा कमाएर बजारबाट बाहिरिने लगानीकर्ता बढी हुन्छन् । यसले गर्दा माग र आपूर्ति दुवै बढ्ने गर्छन् । यसरी बजार चलायमान हुँदा शेयरमूल्य पनि बढ्छ तर वाणिज्य बैंकमा शेयरसंख्या धेरै छ, माग थोरै छ । त्यसैले पनि मूल्य बढ्न नसकेको हो ।’

अध्यक्ष रौनियार पनि चलखेल नगर्ने र लामो समयसम्मका लागि लगानी गर्ने लगानीकर्तालाई यी वाणिज्य बैंकहरूको शेयर किन्न उपयुक्त हुने बताउँछन् ।