चितवनमा ध्रुबेको आक्रमणबाट पाँच जना घाइते

२० चैत, चितवन । चितवनमा गैंडा गणनाको टोलीमाथि जंगली हात्तीले आक्रमण गरेको छ । एक सिंगे गैंडाको गणनाका लागि चितवन राष्ट्रिय निकुञ्जमा खटिएको टोलीमाथि जंगली हात्ती ‘ध्रुबे’ले आक्रमण गरेको हो । ध्रुबेको आक्रमणबाट पाँच जना घाइते भएका छन् ।

आक्रमणमा राष्ट्रिय प्रकृति संरक्षण कोषका संरक्षण अधिकृत विनोद श्रेष्ठ गम्भीर घाइते भएका छन्। उनलाई उपचारका लागि साँझ ५ बजेतिर हेलिकप्टरबाट काठमाडौं पठाइएको छ । गैंडाको गणनाका लागि शुक्रबार निकुञ्जको टोली पश्चिम सेक्टरको गैंडाखासा भन्ने ठाउँमा पुगेको थियो। जंगली हात्तीले टोलीलाई लखेट्न थालेछ, भागाभाग हुँदा पाँच जना कर्मचारी घाइते भएका छन् ।

निकुञ्जका अनुसार चार जनालाई सामान्य चोट लागेको छ। ध्रुबे नामको जंगली हात्तीले वि.सं. २०६६, ६७, ६८ र ६९ सालमा गरी १३ जनाको ज्यान लिएको थियो। धेरैको ज्यान लिएपछि यसलाई मार्न सरकार नै लागिपरेको थियो।

उक्त घटनासँगै चितवन निकुञ्जमा जारी रहेको गैंडा गणना कार्य तत्कालका लागि स्थगित गरिएको छ। चितवन राष्ट्रिय निकुञ्जमा चैत ९ गतेबाट एक सिंगे गैंडाको गणना सुरू गरिएको थियो। हाल बर्दिया निकुञ्ज र शुक्लाफाँटा निकुञ्जमा पनि गणना चलिरहेको छ। गैंडा गन्नका लागि गणकहरूले हात्तीकै प्रयोग गर्ने गर्दछन्।