नेपाल समुहले दुई महिना नेताहरूलाई जिल्लामा खटाउने

२१ चैत, काठमाडौं । नेकपा एमाले माधव नेपाल पक्षको स्थायी कमिटी बैठकले आगामी दुई महिना देशभरि संगठन निर्माण र पार्टी सुदृढीकरण अभियान चलाउने भएको छ। शनिबार कलंकीमा बसेको स्थायी कमिटी बैठकले नेकपा एमालेको एकता र कम्युनिष्ट आन्दोलन बचाउने मूल उद्देश्य साथ संगठन निर्माण र सुदृढीकरण अभियान चलाउने निर्णय भएको हो ।

विशेषगरी २०७५ जेठ २ गते कायम भएका पार्टी कमिटीहरूको पुनर्गठन, पुनस्सञ्चालन, बैठक, भेला र प्रशिक्षण कार्यक्रम सञ्चालन गरिने छ । यसका निम्ति केन्द्रीय सदस्य तथा प्रतिनिधिको रुपमा कार्यविभाजन गरेर दुई महिना नेताहरूलाई जिल्लामा खटाउने निर्णय भएको छ।

यो बीचमा पार्टी एकता रक्षाका लागि देशभरि प्रचार, गोष्ठी र अन्तरक्रिया गरिने छ । माधव समूहले वैशाख ९ गते पार्टी स्थापना दिवसको अवसरमा कम्युनिष्ट आन्दोलनको एकतालाई ध्यान दिँदै काठमाडौंमा भव्य कार्यक्रम गर्ने छ।

१३ गते मनमोहन अधिकारी स्मृति दिवसलाई एकताकै सन्दर्भका रुपमा मनाउने र विराटनगरमा केन्द्रीयस्तरको कार्यक्रम गर्ने भएको छ।
जेठ ३ गते मदन भण्डारी र जीवराज आश्रितको स्मृति दिवसमा चितवनमा राष्ट्रियस्तरको कार्यक्रम गर्ने पनि निर्णय भएको छ ।

बैठकले फागुन २३ गते सर्वोच्च अदालतले गरेको फैसला अनुसार नै जेठ २ गते पार्टी अध्यक्षलाई पार्टीमा फर्कन समेत आग्रह गरेको छ । यस्तैबैठकले चैत ४ र ५ गते राष्ट्रिय कार्यकर्ता भेलामा प्रस्तुत भएको एउटा अवधारणा पत्र प्रतिवेदनमा आएका सुझाव र स्थायी कमिटी र केन्द्रीय कमिटीका सदस्यले दिएको सुझावलाई अन्तिम रुप दिएको छ। यसलाई प्रकाशित गरेर पार्टीव्यापी वितरणमा लगिने छ ।

पार्टीमा उत्पन्न भएको अन्तरविरोध, राजनीतिक, सैद्धान्तिक, वैचारिक, कार्यशैलीगत भिन्नतामा उठाइएका कुराहरूहरू समग्रतामा प्रकाशित गरेर पार्टीव्यापी रुपमा प्रशिक्षणका लागि प्रकाशित गरिने छ ।