म्यान्मार सैनिक कू : देशभित्र मात्रै हैन, विदेशमा पनि प्रदर्शन

२२ चैत, एजेन्सी । म्यान्मारमा भएकाे सैनिक कू विरोधमा विदेशमा पनि विरोध प्रदर्शन भएको छ । म्यान्मारको सेनाले सत्ता हत्याएको विरोधमा देशभित्र मात्रै हैन, विदेशमा पनि विरोध प्रदर्शनहरू हुन थालेका हन्।

बिहीवार लन्डनस्थित पार्लियामेन्ट स्क्वायरबाहिर नेपाली मूलका लगायत सैयौँ बर्मेलीहरूले म्यान्मारको सेनाले सर्वसाधारण जनताको हत्या गरेको भन्दै विरोध प्रदर्शन गरेको बीबीसीले जनाएको छ । लन्डनमा भेला भएका बर्मेलीहरूमा नेपाली भाषी बाहेक मुसलमान र अन्य समुदायका सदस्य पनि सम्मिलित थिए।

लन्डनमा भेला भएका प्रदर्शनकारीहरुले ब्रिटेनको परराष्ट्र, राष्ट्रमण्डल तथा विकास मन्त्रालयमा एक ज्ञापनपत्र पनि बुझाएका छन्। ब्रिटेनले एक सय वर्षभन्दा बढी समय बर्मामा शासन चलाएको थियो। सन् १९४८ मा मात्रै बर्मा ‘हाल म्यानमार’ ब्रिटिस शासनबाट स्वतन्त्र भएको थियो।

यस्तै म्यानमारमा रहेको सैनिक सत्तापलट लगत्तै छिमेकी थाइल्यान्डमा रहेका बर्मेली नेपाली समुदायका सदस्यहरूले विरोध जनाएका थिए।
म्यान्मारमा सेनाले अहिलेसम्म कम्तीमा ३५ जना नेपालीभाषीलाई पक्राउ गरेको र दुई जना नेपालीभाषी मारिएका म्यान्मारस्थित नेपालीभाषीका सङ्घसंस्थाहरुले जनाएका छन्।

यस्तै, यूकेस्थित रोहिङ्गीया समुदाय, कचिन कम्युनिटी यूके, यूके बर्मिज मुस्लिम एसोसिएसन लगायतका संस्थाहरूले बुझाएको एक संयुक्त ज्ञापनपत्रमा ब्रिटिस सरकारलाई म्यान्मारको सेनाले असंवैधानिक तवरबाट स्थापना गरेको सत्तालाई मान्यता नदिन, म्यान्मारको सेनालाई हातहतियार बिक्री गर्न तत्काल विश्वव्यापी रोक लगाउन पहल गर्न तथा निर्दोष जनताको थप ज्यान जानबाट जोगाउन संयुक्त राष्ट्रसङ्घ सुरक्षा परिषद्द्वारा ुसुरक्षाको जिम्मेवारीुको सिद्धान्तलाई अनुमोदन गर्न आह्वान गरिएको छ ।