बङलादेशमा आउँदो सोमवारदेखि लकडाउन गरिने

२२ चैत, एजेन्सी । बङलादेश बढ्दो कोरोना भाइरस संक्रमण रोक्ने उद्देश्यका साथ आउँदो सोमवारदेखि एक साता लामो देशव्यापी लकडाउन गरिने भएको छ । बीबीसी समाचारका अनुसार लकडाउन अवधिभर त्यहा रहेका सबै सरकारी कार्यालय तथा अदालतहरू बन्द रहने जनाइएको छ । तर प्रवासी मजदूरहरूको आफ्नो गाउँघरतर्फको आवतजावत रोक्न औद्योगिक गतिविधिहरू जारी राखिने छन्।

गत वर्ष पनि कोभिडका कारण बङलादेशमा करिब तीन महिना लकडाउन गरिएको थियो।समाचारमा जनाइए अनुसार शुक्रवार बङलादेशमा एकैदिन ६ हजार ८सय जना कोरोना भाइरस संक्रमणको पुष्टि भएको थियो ।

सो सङ्ख्या महामारी सुरु भएयताकै सर्वाधिक दैनिक सङ्ख्या समाचारमा जनाइएको छ । यसरी कोरोना संक्रमण वृद्धिले खासगरी राजधानी ढाकाका अस्पतालहरू चर्को दबाबमा परेका छन्। बङलादेशमा कोरोना भाइरसका कारण नौ हजारभन्दा धेरै मानिसको ज्यान गइसकेको छ। छिमेकी भारतमा पनि लगातार तेज गतिमा कोरोना संक्रमण फैलिरहेको छ।

संक्रमण फेरि बढ्न थालेको केही साताभित्रै त्यहाँ एकैदिन झन्डै ९० हजार संक्रमित भएका छन्। हालसम्म भारतमा कोरोनाका कारण एक करोड २३ लाख मानिस सङ्क्रमित भइसकेका छन् भने एक लाख ६४ हजारभन्दा धेरैको ज्यान गइसकेको छ।

त्यहाँ हाल सबभन्दा धेरै संक्रमण महाराष्ट्र राज्यमा देखापरेको छ। सो राज्यका मुख्यमन्त्रीले संक्रमण नघटेमा लकडाउन लगाउने सम्भावन अस्वीकार गर्न नसकिने चेतावनी दिएका छन्।