सरकारको थारू कल्याणकालीसभासँगको वार्ता सकारात्मक

२२ चैत, काठमाडौं । नेपाल सरकार र थारू कल्याणकारीसभा सङ्घर्ष समितिसँगको दोस्रो वार्ता सकारात्मक भएको छ । वार्ताका क्रममा सङ्घर्ष समितिले राखेका मागहरुका बारेमा थप व्याख्या र छलफल भएको सरकारी वार्ता समितिका सदस्य डा राजन भट्टराईले जानकारी दिए । वार्ता सहमति उन्मुख रहेको र अर्को चरणकोे वार्ता निकट भविष्यमै हुने उनले जानकारी दिए ।

वार्ता टोली संयोजक रुक्मिणी चौधरीले आफूहरुको १९ बुँदे मागमध्‍ये ठोस मागको सूची लिएर आउन सरकारी वार्ता टोलीले आग्रह गरेको बताइन् । सरकारी टोली यस मानेमा सकारात्मकता देखाएको छ। वार्ता फेरि तेस्रो चरणमा हुनेछ चौधरीले भनिन् ।

सरकारी वार्ता टोलीमा गृहमन्त्री रामबहादुर थापा (बादल) को नेतृत्वमा प्रधानमन्त्रीका परराष्ट्र मामिला सल्लाहकार डा.राजन भट्टराई र पूर्वसासंद भगवती चौधरी रहेका छन् । थरुहट/थारुवान संघर्ष समितिका तर्फबाट पूर्वसांसाद रुक्मणी चौधरीको संयोजकत्वमा प्रेमीलाल चौधरी, पदमनारायण चौधरी, चन्द्रप्रसाद चौधरी र प्रभात चौधरी रहेका छन् । सरकारले वार्ताका लागि गत सोमबार मात्र वार्ता समिति बनाएको थियो।

२०७२ भदौमा कैलालीको टीकापुरमा भएको थरुहट आन्दोलनका क्रममा नेपाल प्रहरीका एसएसपी लक्ष्मण न्यौपानेसहित ७ जनाको मृत्यु भएको थियो । उक्त घटनामा दोषी ठहर भएका सांसद रेशम चौधरीसहित नेताहरु जेलमा छन् ।