रुद्रान्जु प्रतिष्ठानद्वारा रक्तदान कार्यक्रम सम्पन्न

२२ चैत, काठमाडौं । कीर्तिपुर–१०, ट्याङ्लाफाँट स्थित नवजागरण महिला समूहको आयोजना तथा नेपाल रेडक्रस सोसाईटीको सहयोगमा रुद्रान्जु प्रतिष्ठानको प्राङ्गणमा रक्तदान कार्यक्रम सम्पन्न भएको छ । उक्त कार्यक्रममा स्थानिय तथा अन्य दाताहरुसहित ४० जना महानुभावहरुले रक्तदान गरेको जनाइएको छ ।

कार्यक्रममा अध्यक्ष लक्ष्मी पाण्डेले रक्तदाता सबैलाई हृदयदेखि धन्यवाद दिँदै नवजागरण महिला समूहको पहलमा आयोजित रक्तदान कार्यक्रमले सफलता पाएकोमा खुसी व्यक्त गरिन् । त्यस्तै, उपाध्यक्ष टिकादेवी खनालले भविष्यमा पनि यस्ता कार्यक्रम गर्दै समाज सेवामा हरदम अग्रसर रहने प्रतिबद्धता जनाइन् ।

नवजागरण महिला समूहले आफैंमा आदर्श स्थापित गर्दै समाजसेवी कार्यक्रमहरु आयोजना गरी अन्यलाई पनि यस्ता कार्यमा सहभागी गराउँदै आएको छ । देख्दा सानो भएता पनि समाजमा यस्ता कार्यले ठुलो प्रभाव पार्ने यो उदाहरणीय प्रयास भएको उस्थित व्यक्तिहरुले बताएका थिए ।