चिडियाखानामा राखियो बर्दियाबाट ल्याएको बाघ

२४ चैत, काठमाडौं । बर्दिया राष्ट्रिय निकुञ्जबाट ल्याएको बाघलाई मंगलबार विहान सदर चिडियाखानामा राखिएको छ । बाघलाई निकुञ्जको टोलीले आइतबार साँझ नियन्त्रणमा लिएका थिए ।

बर्दिया राष्ट्रिय निकुञ्जमा गैंडा गणना गर्न हात्तीसहित गएका गडकलाई यो बाघले आक्रमण गरेको थियो । गैंडा गणना गरेर फर्किने क्रममा हात्तीलाई नुहाइदिनुका साथै घास पनि जोहो गर्ने क्रममा बाघले ३४ वर्षीय पुलिसराम थारूलाई आक्रमण गरेको थियो । आक्रमणबाट थारूको मृत्यु भएको छ ।

उक्त बाघले केही अगाडि पनि निउरो टिप्न गएकी एक महिलालाई मारेको आशंका गरिएको छ । बाघले दोहोर्‍याएर मान्छे मार्न थालेपछि तत्काल व्यवस्थापन गर्नु परेको हो ।