सरकार अब कहिल्यैपनि लकडाउनमा जादैन : स्वास्थ्यमन्त्री

२४ चैत, काठमाडौं । स्वास्थ्य तथा जनसंख्या मन्त्री हृदयेश त्रिपाठीले कोभिड–१९ रोकथामका लागि सरकार अब कहिल्यैपनि लकडाउनमा नजाने बताएका छन् । मंगलबार काठमाडौंमा आयोजित ‘नेपाल हेल्थ कनक्लेभ २०२१’ मा बोल्दै मन्त्री त्रिपाठीले सरकार लकडाउन गर्ने मनस्थितिमा नरहेको बताएका हुन् ।

लकडाउनले सामाजिक जनजीवन प्रभावित पार्ने र अर्थतन्त्रमा दीर्घकालीन असर पार्ने भएकाले सरकार त्यसको पक्षमा नरहेको मन्त्री त्रिपाठीले भनेका छन् । त्यस्तै छिमेकी मुलुकमा कोभिड – १९ को नयाँ लहर आएकाले नेपालले सीमा नाकामा एन्टिजेन परीक्षण शुरु गरेको उनले बताए । अहिले सीमा नाकामा धमाधम आइसोलेसन र क्वारेन्टिन निर्माण गर्ने काम भइरहेको हुँदा नडराउन पनि उनले आग्रह गरेका छन् ।
‘
अहिले विश्वभर ८१ प्रकृतिका खोप विकसित भइरहेको र त्यसमध्ये १३ वटा खोप प्रचलनमा आइसकेको अवस्थामा नेपालले पनि ३ किसिमका खोपलाई मान्यता दिई प्रचलनमा ल्याएको मन्त्री त्रिपाठीले बताए । नेपाललाई चीन सरकारबाट अनुदानमा उपलब्ध कोभिड–१९ विरुद्धको खोप लगाउने अभियान बुधबार बाट शुरु हुने पनि त्रिपाठीले बताएका छन् ।