खनाल-नेपाल पक्षको सुदूर समानान्तर कमिटीमा भीम रावल

२४ चैत,धनगढी । नेकपा (एमाले) झलनाथ खनाल र माधवकुमार नेपाल पक्षको सुदूरपश्चिम समानान्तर कमिटी बनेको छ । भीम रावल संयोजकत्वमा करिब १८२ जनाको कमिटी बन्न लागेको हो ।

तर खनाल-नेपाल पक्षधर नेताहरूले यसलाई समानान्तर समिति नभई अपूर्ण रहेको समितिको पूर्णता दिएको भनेका छन् । प्रदेश, जिल्ला, स्थानीय तह र भातृ संगठनमा अपुरो रहेका पदमा जिम्मेवारी तोकिएको बताएको छ ।

तत्कालीन नेकपा हुँदा प्रदेशमा १८२ सदस्यीय कमिटी बनेको थियो । अहिले पनि १८२ जना हाराहारीकै संख्यामै कमिटी बनाउन लागिएको छ । कमिटीको विस्तारित स्वरूपबारे भने केहीदिनमै पत्रकार सम्मेलनमार्फत् जानकारी गराउने बताएको छ ।

एमाले नेता भीम रावललाई अध्यक्ष केपी शर्मा ओलीले पार्टीबाट ६ महिनाका लागि निलम्बन गरेका छन् । रावल तत्कालीन एमाले हुँदा र पछि एमाले र माओवादी केन्द्र मिलेर बनेको नेपाल कम्युनिष्ट पार्टी हुँदा पनि सुदूरपश्चिम इन्चार्ज थिए।

यी हुन् जिल्ला अध्यक्षहरू
कैलाली– दीर्घ सोडारी
कञ्चनपुर– तारा लामा तामाङ
डोटी– चक्र बहादुर मल्ल
डडेल्धुरा– तारा जोशी
बैतडी– महादेव भट्ट
अछाम– शेर बहादुर कुँवर
बझाङ– दिल बहादुर सिंह
बाजुरा– गगन रावल

दार्चुला– तोक्न बाँकी