यी हुन नेपाल-खनाल पक्षका ३० जिल्लाका ३० कमाण्डर

२५ चैत, काठमाडौं । नेकपा एमालेको माधव नेपाल पक्षले ३० जिल्लामा समानान्तर कमिटी बनाएको छ ।

देशभर समानान्तर कमिटी गठन गर्ने क्रममा पहिलो चरणमा गण्डकी प्रदेशका सबै जिल्ला कमिटीहरु बनाएका हो भने दोस्रो चरणमा बाग्मती प्रदेश र सुदुरपश्चिम प्रदेशमा कमिटी बनाइसकेको छ ।

एमाले अध्यक्ष केपी शर्मा ओलीले वरिष्ठ नेता माधवकुमार नेपाल लगायतका चार नेताहरुलाई पार्टीबाट निष्काषण गरेपछि नेपाल समूहले समानान्तर कमिटी बनाउने क्रममा बाग्मती प्रदेशका सबै जिल्लाहरुमा समानान्तर कमिटी बनाएको छ भने सुदुरपश्चिम प्रदेशका ९ जिल्लामा पनि समानान्तर कमिटी तयार भैसकेका छन घोषणा हुन बाँकी रहेको छ । देशभर समानान्तर कमिटी बनाउने क्रममा नेपाल तथा झलनाथ खनाल पक्षले मंगलबार बाग्मती प्रदेशका १३ जिल्ला कमिटी बनाएका छन् ।

खनाल नेपाल पक्षले काठमाडौंमा इन्चार्ज सावित्रा भुसाल, सहइन्चार्ज सुरेन्द्र मानन्धर, अध्यक्ष बसन्त मानन्धर, उपाध्यक्ष शोभा सापकोटा, सचिव कुसुम कार्की र उपसचिव एमपी श्रेष्ठ तोकेका छन् । त्यसैगरी काठमाडौं महानगर इन्चार्ज जीवनराम श्रेष्ठलाई जिम्मेवारी दिइएको छ ।

ललितपुरमा अध्यक्ष हरिकृष्ण थापा, उपाध्यक्ष कृष्णमान लामा, सचिव प्रेम महर्जन, उपसचिव तारा सञ्जेल र महानगरपालिका अध्यक्षमा श्रीगोपाल महर्जन चितवनमा इन्चार्ज कृष्ण खनाल र अध्यक्षमा तेजेन्द्र खड्का बनाइएको छ ।

मकवानपुरमा इन्चार्ज विरोध खतिवडा, अध्यक्ष मुनु सिग्देल, उपाध्यक्ष बद्री लम्साल, सचिव विष्णु ढकाल र उपसचिवको जिम्मा मिना लामा रहेका छन् ।

भक्तपुरमा इन्चार्ज सोमप्रसाद मिश्र, अध्यक्ष रजन केसी र सचिवमा अनिल श्रेष्ठ ,रामेछापमा इन्चार्ज देवशंकर पौडेल, अध्यक्ष शान्ति पौडेल र सचिवमा ज्ञानकुमार श्रेष्ठ, सिन्धुपाल्चोक इन्चार्जमा अरुण नेपाल, अध्यक्षमा झंक नेपाल, उपाध्यक्षमा इन्द्रमाया गुरुङ, सचिवमा कमल नेपाल र उपसचिवमा सूर्य लामा रहेका छन् ।

त्यस्तै सिन्धुलीमा इन्चार्ज कमलजंग राई, अध्यक्षमा सूर्य पाख्रिन, उपाध्यक्षमा चित्रबहादुर लुमेली र सचिवमा तारानिधि पोखरेललाई जिम्मेवारी दिइएको छ । रसुवामा इन्चार्ज माधव अर्याल, अध्यक्षमा पेम्बा तामाङ र सचिवमा शिव लामिछाने,धादिङमा अध्यक्ष शिवराज कँडेल, उपाध्यक्षमा इन्दिरा ढुंगाना, सचिव सुवास खतिवडा र उपसचिवमा शम्भु थापालाई जिम्मेवारी दिइएको छ ।

सुदुरपश्चिम प्रदेशका ९ जिल्लामा सबै कमिटीहरु तयार भैसकेको र घोषणा हुन मात्रै बाँकी रहेको छ । सुदुरपश्चिम प्रदेशमा कमिटी निर्माणको क्रममा इन्चार्ज भीम रावल आफै खटिएका छन् । दुई दिनदेखि उनी कैलालीमा बसेर छलफल गरिरहेका छन् । अन्य पूर्वमा चार जिल्लामा पनि समानान्तर कमिटी बनाइसकेका छन् ।

प्रधानमन्त्री एवं एमाले अध्यक्ष केपी शर्मा ओलीले गत साता पार्टी सदस्यबाट ६ महिनाका लागि निलम्बन गरेका सुरेन्द्र पाण्डेले गण्डकी प्रदेशको कमाण्ड सम्हाल्दै सबै जिल्लामा समानान्तर जिल्ला कमिटी बनाएका छन् । माधव नेपाल समूहले कलंकीको मेघा पार्टी प्यालेसमा दुई दिनसम्म बसेको केन्द्रीय कमिटीको बैठकले गण्डकीमा सुरेन्द्र पाण्डे,प्रदेश १ मा भीम आचार्य, प्रदेश २ मा घनश्याम भुसाल, वागमतीमा अष्टलक्ष्मी शाक्य, लुम्बिनी र कर्णालीमा युवराज ज्ञवाली र सुदूरपश्चिम प्रदेशमा भीम रावल इन्चार्ज तोकेर समानान्तर कमिटी बनाउने निर्णय गरेको थियो । त्यही अनुसार एमाले अध्यक्ष ओलीले निलम्वन गरेका नेता सुरेन्द्र पाण्डेलाई गण्डकी प्रदेशको संयोजक बनाएको छ ।

कास्कीमा विहिबार माधव नेपालकै उपस्थितिमा भएको भेलाबाट पाण्डेलाई प्रदेश संयोजक तोकेको छ । पाण्डेले २५ सदस्यीय सचिवालय समेत बनाएका छन् । केन्द्रीय सदस्य दिलु पन्तका अनुसार गण्डकी प्रदेशका सबै जिल्लामा अध्यक्ष र सचिव चयन भईसकेका छन् । उनका अनुसार प्रदेश कमिटीको सहसंयोजकमा तुलबहादुर गुरुङ र श्रीमाया थकाली चयन भएका छन् । ‘देशभर नै समानान्तर कमिटी बनाउने निर्णय भएको छ । त्यही अनुसार गण्डकीका सबै जिल्लामा समानान्तर कमिटी बनेको हो’, केन्द्रीय सदस्य पन्तले भनिन् ।

कास्कीमा अध्यक्ष धनराज आचार्य र सचिवमा होम नेपाली चयन गरिएको छ । स्याङजामा अध्यक्ष रामचन्द्र भट्टराई र सचिवमा भूपराज अधिकारी चयन गरिएको छ । म्याग्दीमा बालकृष्ण सुवेदी, बागलुङमा इन्द्रलाल सापकोटा, पर्वतमा भक्त कुँवर र सचिवमा पदमपाणी शर्मा चयन भएका छन् । शर्मा भने ओली पक्षका नेता आनन्द पोखरेलका छोरी ज्वाई हुन् ।

त्यस्तै तनहुमा शंकरनारायण श्रेष्ठ अध्यक्ष चयन भएका छन् भने गोरखामा यसअघि उपाध्यक्ष यादव बस्नेतको नेतृत्वमा समिति गठन गरिएको र कार्यालय समेत सञ्चालनमा आइसकेको छ । नवलपुर र लम्जुङमा पनि अध्यक्ष र सचिव चयन भैसकेका छन् । नेपाल पक्षले यसअघि खोटाङमा बबी चाम्लिङलाई अध्यक्षमा चयन गरिसकेको छ । यसैगरी सर्लाहीमा रेवती पन्त चयन भैसकेका छन् । सर्लाहीमा ओली समूहले पन्तलाई अध्यक्ष अस्वीकार गरिसकेको छ ।

भोजपुरमा शरण राईलाई संयोजक तोकिएको छ । संखुवासभामा हेमराज घिमिरेको नेतृत्वमा जिल्ला कमिटी पुनर्गठन भएको छ । तेह्रथुमको जिल्ला कमिटीमा एक पदाधिकारीबाहेक सबै नेपाल पक्षमै रहेका छन् । त्यस्तै अर्घाखाचीमा रामबहादुर चौहानलाई संयोजक बनाइएको छ । त्यस्तै युवा संघमा नरेश शाही, विद्यार्थीमा सुदेश पराजुलीलाई अध्यक्ष बनाइसकेको छ । युवा संघको भने छुट्टै कार्यालय बनाइएको छ ।