एसपी आभूषणको नियति: एक वर्ष कतैपनि नटिक्ने

१९ चैत, काठमाडौं । केन्द्रीय अनुसन्धान व्यूरोमा एसपी आभूषण तिमल्सिना र अर्का एसपी वेलबहादुर पाण्डेको कोठा एउटै थियो । दुवै एसपी आमुन्ने सामुन्ने बस्थे । सीआईबीमा तिमल्सिना निकै अगाडिदेखि नै थिए । जिल्ला प्रमुखको रुपमा कँही नटिकेपछि उनलाई कि त सीआईबी कि प्रहरी प्रधान कार्यालयमा थन्क्याइन्थो ।

करिब एक वर्ष अघि पाण्डे पनि सीआईबी आइपुगे । दाङको प्रहरी प्रमुख हुँदा आर्थिक रुपमा नराम्ररी मुछिएका पाण्डेलाई सीआईबीमा तिमल्सिनाले गोरु गोठालो भनेर बोलाउँथे । हुनपनि दाङका गोरु बंगलादेश तस्करी गरी पठाउनमा उनको भूमिका ठूलै थियो । ‘आर्थिक रुपमा बद्नाम पाण्डेले गोरु मात्रै तस्करी गरेनन, त्यहाँका क्रसर उद्योगबाट महिनाको लाखौ रुपैयाँ असुली गरे’, दाङका एक रैथाने पूर्व प्रहरीले भने ।

अहिले त्यही काम ५ नं प्रदेशका प्रमुख डीआईजी रविन्द्र धानुकले सम्हालेका छन भने त्यसलाई एसपी गणेश चन्दले सहयोग गरिरहेका छन् । केही प्रहरी अफिसर्सकै अगाडी सीआईबीमा अनुसन्धान गर्न गोरु गोठालो गरेजस्तो सजिलो हुँदैन भन्दै जिस्काउँथे । एसपी तिमल्सिनाले जिस्काउन थालेपछि पाण्डेले आफ्नो कोठा नै परिवर्तन गरेका थिए ।

पाण्डे सीआईबीमा प्रवक्ता भएपछि पर्साको जिम्मेवारी लिएर सरुवा भए । उनको स्थानमा अहिले गंगा पाण्डे आएकी छिन् । तिमल्सिना पनि सिन्धुली प्रहरी प्रमुखको जिम्मेवारी लिएर सिन्धुली पुगे । पाण्डे पर्सामा राम्रैसँग त्यहाँका व्यापारीलाई मिलाएर बसेका छन् भने तिमल्सिना सिन्धुली पुगेको दुई महिनामै तानिएका छन् ।

प्रहरी प्रधान कार्यालयले गत बिहीबार उनलाई हटाएर मानव बेचविखनमा रहेका एसपी गोविन्द थपलियालाई सिन्धुलीको जिम्मेवारी दियो । एसपी तिमल्सिनाको कार्यशैलीप्रति अत्याधिक गुनासो आएपछि गृह मन्त्रालयकै निर्देशनमा उनलाई हटाइएको स्रोतले बताएको छ । उनको गत २१ पुषमा सिन्धुलीमा सरुवा भएको थियो ।

उग्रस्वभाव भएका एसपी तिमिल्सना यसअघि पनि अवधि नपुगी तानिदै आएका छन् । यसअघि कैलालीबाट पनि उनलाई ६ महिनामै हटाइएको थियो । स्याङजामा पनि उनको कार्यकाल त्यस्तै भयो । इन्सपेक्टरमा दरबारमार्ग हुँदादेखि नै उनी उग्रस्वभावको कार्यशैलीका कारण पटक पटक विवादमा पर्दै आएका छन् ।

गएको दुई महिनामै आभूषणले के के विगारे भन्नेबारे खुलेको छैन । उनले त्यहाँका खोलामा खुलेका क्रसर उद्योगीलाई कार्यालयमै बोलाएर पैसा मागेको जस्तो आरोप लगाइएको छ । यद्यपि उनका समकक्षीहरु तिमल्सिनामा पैसाको भोक छैन तर उनी निकै कडा मिजासको भएका कारण क्रसर व्यवशायीले गृहमन्त्रीका सुपुत्र प्रतिक थापालाई राम्रै बुझाएपनि उनलाई फिर्ता गरेर थपलियालाई पठाएको स्रोतको दावी छ ।