पत्रकार महासंघको मतपरिणाम : लोकतान्त्रिक गठबन्धनको अग्रता

२६ चैत, काठमाडौं । नेपाल पत्रकार महासंघको २६ औं महाधिवेशनबाट संयुक्त लोकतान्त्रिक गठबन्धनको शानदार विजय यात्रा सुरु भएको छ । हिजो सम्पन्न मतदानको गणना जारी छ । कतिपय जिल्लामा भने परिणाम सार्वजनिक हुँदा विपुल पोखरेलले नेतृत्व गरेको गठबन्धनले अग्रता लिएको छ ।

हालसम्म घोषित मतपरिणाम अनुसार, पोखरेल नेतृत्वको प्यानलले ताप्लेजुङ,तेह्रथुम,धनकुटा, खोटाङ, उदयपुर, रामेछाप, दोलखा , ललितपुर , मकवानपुर नुवाकोट लगायत जिल्लामा विजय प्राप्त गरेको छ । यस्तै लुम्बिनी र सदूर पश्चिम प्रदेशमा समेत लोकतान्त्रिक प्यानलको अग्रता देखिएको छ ।

यस्तै , केपी ओली नेतृत्वको एमाले निकट पत्रकारहरुको संगठन प्रेस चौतारी गठबन्धनको नेतृत्व निर्मला शर्माले गरेकी छन् । उनको समूहले पनि केही जिल्लामा आफ्नो वर्चश्व कायम राख्न सफल भएको छ । जसमा भोजपुर, ओखलढुंगा, सोलुखुम्बु सिन्धुली लगायत रहेका छन् ।

उता, स्वतन्त्र पत्रकार गजेन्द्र बुढाथोकीको भने कमजोर अवस्था देखिएको छ । हालसम्मको मत परिणाम उनका लागि सुखद देखिएको छैन । सबै जिल्लामा उनको अवस्था तेस्रो नै रहेको छ । प्रादेशिक रुपमा चर्चा गर्दा प्रदेश नं १ मा लोकतान्त्रिक गठबन्धनको मत अग्र स्थानमा रहेको छ । जस अनुसार,धनकुटामा पोखरेलले ८३ मत पाउँदा शर्माले ३३ र बुढाथोकीले केवल ३ मत पाएका छन् ।

यस्तै,उदयपुरमा पोखरेलले ४४ मत पाउँदा शर्माले ३८ र बुढाथोकीले १० मत पाएका छन् । यो जिल्ला बुढाथोकीको गृह जिल्ला हो । उता,सोलुखुम्बुमा पोखरेलले ३२ मत पाएका छन् भने शर्माले २५ भोट ल्याउन सफलता पाएकी छन् । जबकी बुढाथोकीले यो जिल्लामा केवल १ मत पाएका छन् । देशै भरिको मतपरिणाम लगभग उस्तै प्रकृतिको देखिएको छ । आज साँझसम्म सबैतिरबाट मत परिणाम आउन सक्ने अनुमान गरिएको छ ।