अति भो ओलीको तमासाः गगन

२६ चैत, काठमाडौं । नेपाली कांग्रेसका चर्चित नेता गगनकुमार थापाले प्रधानमन्त्री केपी ओलीले विकास निर्माणको नाममा बेतुकको तमासा देखाएको आरोप लगाएका छन् । प्रतिनिधिसभाको आजको बैठकमा भाग लिंदै थापाले भने– प्रधानमन्त्रीलाई शिल्यान्यास र उद्घाटन गर्नैपर्ने विचित्रको रोग लागेको छ, अब बालुवाटारमा बनेको नयाँ घरको कोठाको पनि उद्घाटन गर्नुहोस् ।

साथै पाँच वर्षपछि बन्ने भवनको समेत अहिल्यै शिलान्यास गर्नाेस् भन्दै उनले विकास निर्माणको नाममा तमासा गरेको बताए । आफ्ना हुक्के, बैठके र चम्चेलाई वरिपरी राखेर विकास गरेको गँजेडी गफ गर्ने बानी परेका प्रधानमन्त्रीले आफ्नो कार्यकालमा सिन्को नभाँचेको धारणा राखे ।

सञ्चालनमा आएको दुई वर्षपछि ओलीले एउटा पुलको उद्घाटन गरेको प्रसंग झिक्दै प्रश्न गरे–मेलम्चीको उद्घाटन गर्दा ढिला भएकोमा जनतासँग माफी माग्नुको बदला ठूलो काम गरेको फूर्ति लाउनु हुन्छ ? सात आठ वर्षमा सम्पन्न हुनुपर्ने आयोजना पूरा गर्न २३ वर्ष लाग्यो त्यसको लागि माफी माग्नु त कता हो कता उल्टो उद्घाटन गर्न तामझाम गर्ने तमासा गरियो ।

जनतालाई बेवकुफ बनाउने काम नगरौं प्रधानमन्त्री ज्यू, तपाईंसँग तथ्य र तथ्याङ्कमा आधारित भएर वहस गर्न तयार छांै भन्दै नेता थापाले भने –सुरु नै नभएको सडकको समेत उद्घाटन त्यो पनि रिमोटबाट । प्रधानमन्त्रीले झुटको पुलिन्दा बनाएर जनतालाई बेवकुफ बनाउन खोजेकोमा उनले आपत्ति जनाए ।