कूविरुद्धको प्रदर्शनमा सहभागी चर्चित सेलिब्रिटी पक्राउ

२६ चैत, एजेन्सी । म्यानमारका एक चर्चित सेलिब्रिटी पक्राउ परेका छन् । म्यानमारमा सेनाले गरेको कूविरुद्धको प्रदर्शनमा सहभागी भएका चर्चित भएका पाइङ टाखोन पक्राउ परेका हुन् ।

टाखोनलाई आज बिहान पाँच बजे उनकै घरबाट पक्राउ गरिएको बीबीसीले जनाएको छ । टाखोनका समर्थक म्यानमारका साथै थाइल्याण्डमा पनि छन् । १० लाखभन्दा धेरै फलोअर्स रहेको उनको इन्स्टाग्राम र फेसबुक एकाउन्ट पनि हटाइएको छ ।

टाखोनकी बिहिनीले सामाजिक सञ्जाल फेसबुकमा गरेको पोस्ट अनुसार सेनाको आठ ओटा ट्रकमा करिब ५० सैनिक टाखोनको घरमा आएका थिए । स्थानीयका अनुसार टाखोन पछिल्लो समय ‘गम्भीर डिप्रेसन’को समस्यामा थिए ।

सेनाले फेब्रुअरी १ मा कू गरेसँगै म्यानमारमा आन्दोलन सुरु भएको थियो । उक्त आन्दोलनको क्रममा अहिलेसम्म ६ सयभन्दा धेरै प्रदर्शनकारी मारिइसकेका छन् । पछिल्लो समय सेनाको कूविरुद्धको प्रदर्शनमा निस्किएका कलाकारहरुलाई निसाना बनाएको छ ।

सेनाले यसअघि करिब एक सय फिल्म निर्माता, कलाकार, सेलिब्रिटी र पत्रकारलाई पक्राउको लागि वारेन्ट जारी गरेको थियो । केही दिनअघि म्यानमारका चर्चित हास्य कलाकार पनि पक्राउ परेका थिए ।