आजदेखि आईपीएल सुरु, पहिलो खेल भारतिय कप्तान र उपकप्तान भिड्दै

२७ चैत, काठमाडौं । आईपीएलको १४औँ संस्करण आजदेखि सुरू हुँदैछ । यो पटक उद्घाटन म्याचमा रोयल च्यालेन्जर्स बैंग्लोर (आरसीबी) र गत सिजनको विजेता मुम्बई इण्डियन्स खेल्ने छन् ।

हालसम्म मुम्बईले पाँच पटक उपाधि जितेको छ । आरसीबीले भने एक पटक पनि उपाधि हात पार्न सकेको छैन ।

आरसीबी हालसम्म तीन पटक फाइनलमा पुगेको छ । टिममा कयौँ स्टार क्रिकेटर जोडिए पनि आरसीबीले उपाधि भने हात पार्न सकेको छैन ।

यो पटक पनि आरसीबीमा केही चर्चित क्रिकेटर जोडिएका छन् । ग्लेन म्याक्सेवल, काइल जेमिसन, डानियल क्रिस्टियन लगायतलाई आरसीबीले महँगो मूल्यमा टिममा अनुबन्ध गरेको छ ।

मुम्बईले यो पटक अक्सनबाट पियूष चावला, जिमी नीशम, एडम मिल्नेलगायतलाई अनुबन्ध गरेको थियो ।आरसीबी र मुम्बईबीचको पहिलो म्याच शुक्रबार नेपाली समयअनुसार साँझ ७ः४५ बजेदेखि चेन्नईमा सुरू हुनेछ ।

कोरोना संक्रमण कायमै भए पनि यो पटक भारतमै आईपीएल हुँदैछ । गत सिजनको आईपीएल कोरोना कारण यूएईमा भएको थियो । यो पटक आईपीएलमा बीसीसीआईले केही नियम परिवर्तन गरेको छ ।

मुम्बईको सम्भावित प्लेइङ-११  रोहित शर्मा (कप्तान), इशान किशन (विकेटकीपर), सूर्यकुमार यादव, हार्दिक पाण्ड्या, किरण पोलार्ड, जेम्स नीशम, कृणाल पाण्ड्या, नाथन कूल्टर९नाइल, राहुल चहर, ट्रेन्ट बोल्ट र जसप्रीत बुमराह ।

आरसीबीको सम्भावित प्लेइङ-११  विराट कोहली (कप्तान), देवदत्त पाडिक्कल, एबी डिभिलियर्स, ग्लेन म्याक्सवेल, मोहम्मद अजहरुद्दीन (विकेटकीपर)।डानियल क्रिश्चियन, वाशिङ्टन सुन्दर, काइल जेमिसन, नवदीप सैनी, मोहम्मद सिराज र युजवेन्द्र चहल ।