भारतमा कोरोनाविरूद्धको खोप लगाएका ३७ डाक्टरहरूमा संक्रमण

२७ चैत, एजेन्सी । भारतमा पछिल्लो २४ घण्टामा एकैदिन १ लाख ३१ हजार संक्रमित थपिएका छन् । नयाँ संक्रमितको यो संख्या कोरोना महामारी शुरु भएदेखिकै सबैभन्दा धेरै रहेको समाचार एजेन्सीहरुले जनाएका छन् ।

समाचारमा जनाइए खनुसार भारतमा गत २४ घण्टाको अवधिमा ७ सय ८० जनाको मृत्यु भएको छ । भारतमा कोरोना संक्रमित व्यक्ति फेला पर्ने दर ९.२१ प्रतिशत पुगेको छ अर्थात् हरेक १ सय जनामा ९ जना व्यक्तिमा कोरोना संक्रमण पुष्टि भएको छ ।

समाचारमा उल्लेख भए अनुसार भारतको राजधानी नयाँदिल्लीको सर गंगाराम अस्पतालका ३७ डाक्टरमा कोरोना संक्रमण पुष्टि भएको छ । यी डाक्टरहरुले कोरोनाविरूद्धको खोप लगाइसकेका थिए ।

संक्रमित डाक्टरहरुमध्ये ३२ जना होम क्वारेन्टाइन रहेको र ५ जना अस्पताल भर्ना भएको समाचार एजेन्सी एएनआईले जनाएको छ ।