आज देशको पहाडी भू-भागमा आंशिक बदली रहने

२८ चैत, काठमाडौं । जल तथा मौसम पूर्वानुमान महाशाखाले हाल देशमा स्थानीय वायुको तथा पश्चिमी वायुको आंशिक प्रभाव रहेको जनाएको छ । महाशाखाको दैनिकी मौसमी बुलेटिन अनुसार शनिबार प्रदेश नं १ लगायत देशको पहाडी भू-भागहरूमा आंशिक बदली रहने सम्भावना छ ।

आज दिउँसो देशका पहाडी भू-भागमा आंशिक देखि सामान्य बदली रही बाँकी भू-भागमा मौसम सफा रहने छ। प्रदेश नं १, बागमती र गण्डकी प्रदेशका पहाडी भू-भागका एक वा दुइ स्थानमा अपरान्ह पछि मेघगर्जनरचट्टयाङसहित क्षणिक वर्षाको सम्भावना रहेको छ ।

यस्तै आज राती देशका पहाडी भू-भागमा आंशिक बदली रही बाँकी भू-भागमा मौसम सामान्यतया सफा रहने छ। यसैबीच, शुक्रबार साँझ हावाहुरीसहितको हल्का बर्षाले विगत केही दिनदेखि काठमाडौं उपत्यकासहित देशभरको वायु प्रदूषणको मात्रा केही कम हुने अनुमान गरिएको छ ।

विगतमा भारतको राजधानी नयाँ दिल्लीमा अत्यधिक मात्रामा वायु प्रदूषण हुँदा भारत सरलारले जनस्वास्थ्य संकटकाल घोषणा गर्नुका साथै त्यसको असर न्यूनीकरणका लागि विविध कार्यक्रमहरू ल्याइएको थियो । तर अपसोच, अहिलेको अवस्थामा हाम्रो देशमा यसरी अत्यधिक वायु प्रदूषण हुँदा पनि सरकारले सर्वसाधारणको स्वास्थ्य रक्षाका लागि केही कदमसमेत उठाएको छैन । यसतर्फ सरकारको ध्यान गएको देखिँदैन ।