केही दिनभित्र नयाँ सरकार गठन हुने प्रचण्डको दाबी

२८ चैत्र, काठमाडौं। प्रमुख प्रतिपक्षीदल नेपाली कांग्रेसको नेतृत्वमा तीन दलको बैठक बसेको भोलिपल्ट नै नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले केही दिनभित्रै नयाँ सरकार गठन हुने दाबी गरेका छन् ।

नेपाल राष्ट्रिय कर्मचारी संगठनको चौथो केन्द्रीय परिषद् बैठकलाई संवोधन गर्दै  ‘प्रचण्ड’ले परिस्थिति सहज नभएपनि छिटै नयाँ सरकार गठन गरेर अगाडि बढ्ने बताएका हुन् ।

‘केही दिनभित्र नयाँ सरकार गठन हुन्छ । कालो बादल हट्छ भन्नेमा म आशावादी छु । त्यो प्रयासमा हामी निरन्तर प्रयासरत छौं,’ दाहालले भने ।अदालतले एमाले र माओवादी केन्द्र ब्युँताउने काम गरेर विचार, धारणा मिलेकालाई जबरजस्ती डिभोर्स गराउने काम गरेको उनले बताए ।  नयाँ सरकार गठन गरेर नयाँ सरकारमार्फत यसबीचमा भएका ज्यादतीलाई सच्याउन प्रचण्डले बताएका छन् ।

जसपाले पनि सरकारको दाबा गरेको प्रति प्रतिसंकेत गर्दै उनले अहिले सरकार कसको नेतृत्वमा हुने र प्रधानमन्त्री को हुने भन्ने कुरा गौण भएको तर परिस्थिति सहज भइनसकेको बताए ।

कांग्रेस सभापति शेरबहादुर देउवाले शुक्रबार सरकार गठनका विषयमा माओवादी र जनता समाजवादी पार्टीका नेताहरूलाई बोलाएर छलफल गरेका थिए । तर छलफल निश्कर्षमा पुग्न सकेको थिएन ।