देउवाको विकल्पमा देखिए डा. भट्टराई

२९ चैत, काठमाडौं । प्रधानमन्त्री केपी ओलीको विकल्पमा नयाँ सरकार दिन नेपाली कांग्रेस सभापति शेरबहादुर देउवाले खुट्टा कमाएको भन्दै जनता समाजवादी दलका नेता डा. बाबुराम भट्टराई अगाडि बढ्ने भएका छन् । ओलीको विकल्पमा देउवालाई अगाडि सार्ने निर्णय पार्टीले गरेको भएपनि चासो नदिएको आरोप लागिरहेका बेला डा. भट्टराई अग्रसर भएका हुन् ।

नेपाली कांग्रेसले आज बोलाएको पदाधिकारी बैठकले सत्ता समीकरणबारे ठोस निर्णय गरोस् भन्दै बिहान मात्रै डा. भट्टराईले देउवालाई फोन गरेको स्रोतको भनाई छ । गएको शुक्रबार देउवाले बोलाएको त्रिदलीय बैठकमा वैकल्पिक सरकार बनाउनेमा जसपाले ठोस जवाफ नदिएको सन्देश बाहिरिएको थियो ।

तर जसपाले अहिलेपनि देउवा नै अलमलमा परेकाले ठोस निर्णय गर्न नसकिएको भन्ने गरेको छ । आज जसपाले पनि पार्टी बैठक डाकेको छ ।जसपा अध्यक्ष उपेन्द्र यादवले समेत कांग्रेस सभापति देउवालाई ओलीविरुद्ध अविश्सास प्रस्ताव दर्ता गर्न आग्रह गरेको स्रोतको भनाई छ ।

कांग्रेसको अगुवाई अगाडि बढौं नभए जसपालाई मौका दिनुप¥यो – यादवले देउवालाई भनेको स्रोतले बतायो । आजको कांग्रेस पदाधिकारी बैठकमा जसपाको प्रस्तावमा समेत छलफल हुने बताइएको छ । उता, जसपाले आज बोलाएको बैठकमा पनि सत्ता समीकरणकै बारेमा छलफल हुने बताइएको छ । अहिले २ बजेका लागि बालकुमारीस्थित पार्टी कार्यालयमा बैठक बोलाइएको छ ।

कांग्रेसले आलटाल गरे जसपा नै अगाडि बढेर ओलीविरुद्ध अविश्वास प्रस्ताव दर्ता गर्न अग्रसर हुनुपर्ने धारणा डा. भट्टराई र यादवको रहेको छ । तर अर्का अध्यक्ष महन्थ ठाकुर र नेता राजेन्द्र महतो भने ओली विरुद्ध तत्कालै प्रस्ताव दर्ता गर्न नहुने पक्षमा रहेका छन् । आजको बैठकले यसबारे पनि टुंगो लगाउने नेताहरुको दावी छ ।