सता समिकरणबारे जसपा छलफलमा

२९ चैत, काठमाडौं । जनता समाजवादी पार्टी (जसपा) ले सता समिकरणबारे छलफल सुरु गरेको छ । पछिल्लाे राजनीतिक घटनाक्रमबारे साझा धारणा बनाएर जानका लागि आज जसपा छलफलमा जुटेकाे हाे ।

आज जसपाका संघीय परिषद अध्यक्ष डा.बाबुराम भट्टराई, अध्यक्षद्वय महन्थ ठाकुर र उपेन्द्र यादव, वरिष्ठ नेताहरु राजेन्द्र महतो, अशोक र राई र राजेन्द्र श्रेष्ठबीच नयाँ सरकार गठनका विषयमा छलफल भएकाे बताइएकाे छ ।

केहि समयअघि प्रमुख विपक्षी दल नेपाली कांग्रेस सभापति शेरबहादुर देउवाले माओवादी केन्द्र र जसपासंग आफ्नो नेतृत्वमा सरकार निर्माणका लागि सहयोग मागेका थिए । उक्त समयमा केहि जवाफ नदिएको जसपाले अबको सरकार गठन विषयमा छलफलमा गरेको हो ।

तेसाे त जसपाले रेशम चौधरीमाथिको मुद्दा र मधेस आन्दोलनका क्रममा आन्दोलनकारीमाथि लगाइएका मुद्दा फिर्ता र संविधान संशोधनको मागलाई केन्द्रमा राखेर सबै दलहरुसँग छलफल गर्दै आएको छ । प्रतिनिधिसभा पुनर्स्थापनापश्चात जसपा नयाँ सत्ता समीकरणमा निर्णायक हुन सक्ने आकलन गरिएको छ।

यतिबेला जसपाको भने आफ्नै दाऊ छ । जसपा सरकारमा आउने वा समर्थन गर्नेबीचमा रहेर आफ्ना केही पुराना मुद्दाहरू सल्टाउन लागिपरेको छ । बन्दी छुटाउने, हत्यारा ठहर भएकालाई सजाय मुक्त गराउने लगायतका मुद्दा जसपाकाे केन्द्रमा छन् । तर यसमा जसपाका सबै एकमुख छन् भन्नु चाहिँ अत्युक्ति हुनेछ ।   किनकि  यहाँ पनि  दुई धार  छ । एउटा धारले ओलीलाई सघाउनुपर्छ भनिरहेको छ भने अर्को धारले ओलीलाई सघाउन नहुने बताउँदै आएको छ ।