पूर्वनिर्धारित १४ औं महाधिवेशनको कार्यतालिका पुन: हेरफेर गर्दै कांग्रेस  

३० चैत, काठमाडाैं । नेपाली कांग्रेसले पूर्वनिर्धारित १४ औं महाधिवेशनको कार्यतालिका केही संशोधन गर्ने भएको छ ।  कार्यतालिका संशोधनका लागि आज केन्द्रीय कार्य समिति बैठक बोलाइएको छ ।  पार्टी केन्द्रीय कार्यालय सानेपामा आज दिउसो बस्ने  बैठकबाट महाधिवेशन कार्यतालिकामा हेरफेरको निर्णय हुने नेताहरुले बताएका छन् ।

पार्टीको क्रियाशील सदस्यता वितरणमा भएको ढिलाइ, नयाँ वितरित र नवीकरण सम्पन्न विवरण प्रणालीमा राख्न गरिएको ढिलाइ र अन्य पार्टीबाट आएकाको समायोजन प्रक्रिया बाँकी रहेका कारण प्रभावित बनेको कार्यतालिकालाई कांग्रेसले हेरफेर एव संशोधन गर्न लागिएको हो ।

कांग्रेसले पछिल्लोपटक २० चैतमा बसेको केन्द्रीय समिति बैठकमार्फत क्रियाशील सदस्यको विवरण देशभरिबाट अनलाइन प्रणालीमा इन्ट्री गर्ने समय चैत मसान्तसम्मका लागि तोकेको थियो । यसअघि कांग्रेसले १० चैतसम्म सो मिति तय गरेकोमा समयभित्र नसकिएपछि पुनः समय थप गरेको थियो ।

हालसम्म ५० जिल्लाले मात्रै क्रियाशील सदस्यको नवीकरण भएको र नयाँ वितरण गरिएको विवरण केन्द्रीय कार्यालयले बनाएको अनलाइन प्रणालीमा पठाउन सुरु गरेका छन् । यस्तै, केही जिल्लाले धेरैजसो विवरण पठाइसकेका छन् भने केहीले सुरु नै नगरेको नेताहरू बताउँछन् । हाल सम्म देशभरबाट ५ लाख ४६ हजार सदस्यको विवरण इन्ट्री भएको र समयावधि थप गर्ने कि नगर्ने भन्ने विषयमा आजै निर्णय लिइने छ ।

विवरण पठाउन भएको ढिलाइपछि सो विषयमा छलफल गर्न भन्दै आइतबार कांग्रेस केन्द्रीय कार्यालय सानेपामा पदाधिकारी र पूर्वपदाधिकारीसहित सदस्यता छानबिन समिति र संगठन समायोजन समितिका सदस्यको बैठक बसेको थियो । बैठकमा कम्तीमा १५ दिन समय थप गर्ने विषयमा अनौपचारिक छलफल भए पनि पार्टी सभापति शेर वहादुर देउवा र बरिष्ठ नेता रामचन्द्र पौडले अनुउपस्थित भएपछि बैठकले निर्णय गर्न सकेन्  ।