तत्काल विद्यालय बन्द नगर्न मन्त्रालयलाई प्याब्सनकाे सुझाव

३० चैत, काठमाडौं । कोरोनाको दोस्रो लहरले मुलुक फेरि आक्रान्त बनेपछि सरकारले विद्यालय तहको पठनपाठन रोक्ने तयारी गरेपनि निजी क्षेत्रको छाता संगठन प्याब्सन भने त्यसको विपक्षमा उभिएको छ । आज बिहान सरकारले सरोकारवाला पक्षसँग गरेको छलफलमा प्याब्सन पदाधिकारीले उही अडान दोह¥याएका छन् । तर कोरोनाको कहर भने बालबालिकामा बढी देखिएको भन्दै सरकार भने विद्यालय बन्द गराउने नै पक्षमा रहेको छ ।

आजको बैठकमा प्याब्सन अध्यक्ष टीकाराम पुरीले अहिले नै विद्यालय बन्द गर्नुपर्ने अवस्था नभएको भन्दै बरु सरकारले चाहेकै भए कक्षा पाँचसम्म भने स्थगित गर्न सकिने बताए । स्वास्थ मन्त्रालयले चाहिं यथास्थितिमा विद्यालय सञ्चालन गर्दा जोखिम उच्च हुने भन्दै अनलाइन विधिबाट कक्षा सञ्चालन गर्न सिफारिश गरेको थियो । खासगरी ठूला र भीडभाड हुने सहरहरुमा तत्कालै विद्यालय बन्द गर्न उसले सुझाव दिएको थियो ।

यतिबेला युके भेरिएन्टबाट संक्रमितको संख्या नेपालमा ह्वात्तै बढेको तथ्याङ्कले देखाएको छ । संक्रमितहरुमध्ये ११ देखि २२ वर्ष उमेर समूहका धेरै पाइएको छ । साथै, १० वर्ष मुनिका पनि कुल संक्रमित मध्ये ४ प्रतिसत रहेको देखिएको छ । कोभिड संकट व्यवस्थापन केन्द्र एमसीसीले समेत कम्तिमा तीन साताका लागि विद्यालय बन्द राख्न सिफारिश गरेको छ ।

तर निजी क्षेत्रका विद्यालय सञ्चालकहरु भने विरोधमा छन् । आज शिक्षा मन्त्रालयमा भएको छलफलमा प्याब्सनका साथै, एन प्याब्सन,अभिभावक संघ र स्थानीय निकायका पदाधिकारीहरु सहभागी थिए ।