नेता तान्ने होडबाजीमा ओली र प्रचण्ड

३० चैत, काठमाडौं । तत्कालिन नेकपा भित्रको अन्तर्संघर्षमा आक्रमक अवस्थामा पुगेका पुष्पकमल दाहाल ‘प्रचण्ड’ सर्वाेच्चको फागुन २३ को फैसलापछि रक्षात्मक भूमिकामा धकेलिएका छन् । नेकपा खारेज भई पूर्व एमाले र माओवादी केन्द्र पुनस्थापना भएपछि राजनीतिले कोल्टे फेरेको छ । अबको राजनीति नयाँ सरकार कि चुनाव भन्नेमै केन्द्रित देखिएको छ ।

नेपाली कांग्रेस र जनता समाजवादी पार्टीको एउटा समूह अब नयाँ सरकार बनाउने भन्दा ओलीले नै गराउने मध्यावधि निर्वाचनबाट मात्रै देशले निकास पाउने धारणा बनाएर बसेको छ । तर नेकपा माओवादी केन्द्र भने तत्कालै चुनावमा जाँदा ठूलै क्षति पुग्ने अनुमान गर्दैछ । खासगरी ओलीले गराउने चुनाव निष्पक्ष नहुने भन्दै सरकारी संयन्त्रको दुरुपयोग हुने ठम्याईमा रहेको छ ।

तर परिस्थिति भने विस्तारै नयाँ निर्वाचनतिरै सोझिएको छ । माओवादी पक्षले पनि अबको निकास निर्वाचनबाटै खोज्ने पक्षमा सबै पुगेकाले आफूहरु पनि त्यही बाटो हिंड्नुपर्ने निश्कर्षमा पुगेको प्रतीत हुुन्छ । त्यसैले गएको शनिबार एउटा कार्यक्रमका प्रचण्डले भनेका थिए–अब हुने निर्वाचनमा ओलीलाई चौथो स्थानमा पु¥याइनेछ ।

त्यसका लागि उनले रामै्र गठबन्धन र मोर्चाबन्दी गर्नुपर्ने अवस्था छ । ओली सत्तामा रहुञ्जेल वाम गठबन्धन र मोर्चाबन्दीमा आघात पुग्ने माओवादीको ठहर छ । त्यसैले अब एमालेलाई कमजोर बनाउने अभियानलाई तीब्रता दिन माओवादी पक्ष जुर्मुराएको छ । पहिलो काम आफ्नो पक्षबाट एमालेमा लागेकाहरुको हाँगा छिमल्ने माओवादीले रणनीति बनाएको छ । ओलीलाई कमजोर बनाउन पहिलो काम आफ्नो पार्टीबाट चुनाव जितेर एमालेमा लागेकाहरुलाई कारबाही गर्न सुरु गरेको छ ।

संघीय संसद्मा सांसद् रहेका रामबहादुर थापा बादल, टोपबहादुर रायमाझी, लेखराज भट्ट, प्रभु साह र गौरीशंकर चौधरीलाई पदमुक्त गरिसकेको छ । यो क्रम प्रदेश तहमा समेत विस्तार गरेको छ । ओली पक्षलाई कमजोर बनाउने काम पहिला त यिनीहरुलाई कमजोर बनाएपछि मात्र हुने ठम्याई माओवादीको देखिन्छ । त्यसैले आजै मात्र उसले प्रदेश नं. २ का चार जना सांसदलाई कारबाही गरेको छ ।

पार्टीले विगतमा माओवादीबाट निर्वाचित भइ हाल ओली पक्षमा लागेको भन्दै प्रदेश सभा सदस्यहरु रामचन्द्र मण्डल, कुन्दनप्रसाद कुशहवा,ज्वाला साह र मोहमद समिरलाई पदमुक्त गर्न संसद्का सभामुखलाई पत्राचार गरिसकेको छ । अब आजैको बैठकमा उक्त सूचना पढेर सभामुखले सुनाएलगत्तै चारैजना पदमुक्त हुने संवैधानिक व्यवस्था रहेको छ ।

संघ र प्रदेशसभामा आफूलाई धोका दिनेहरुलाई कारबाही गर्दै माओवादीले ओलीको संगठन ध्वस्त बनाउने अभियानलाई तीब्रता दिने संकेत गरेको छ । तर एमाले अध्यक्षसमेत रहेका प्रधानमन्त्री केपी ओली भने माओवादी पक्षका गतिला सबै नेता आफूतिर ल्याउने रणनीतिमा रहेका छन् ।

स्रोेत भन्छ–अबको केही दिनमै माओवादीमा पहिरो जानेवाला छ । ठूलै हैसियतका नेताहरु एमाले प्रवेश गर्दैछन् । हरिबोल गजुरेललगायत शीर्ष तहका नेताहरुसँग पनि कुरा भइरहेकाृे उनले बताए । लोकेन्द्र विष्ट पनि एमाले प्रवेश गर्ने सम्भावना स्रोतले औंल्यायो । यसरी हेर्दा ओली र प्रचण्ड एकले अर्कालाई कमजोर बनाउने दाउपेच गरिरहेको अवस्था छ । जसले सक्यो अर्काकोे पक्षमा खेल्ने तयारी गरेका छन् ।