ओलीले बोलाए एमाले केन्द्रीय कमिटी बैठक

३० चैत, काठमाडौं । प्रधानमन्त्री तथा नेकपा एमालेका अध्यक्ष केपी शर्मा ओलीले पार्टीको केन्द्रीय कमिटी बैठक बोलाएका छन् । उनले आगामी वैशाख ६ गते पार्टीको केन्द्रीय कमिटीको बैठक बोलाएका हुन् ।

उक्त बैठकमा पार्टीको महाधिवेशनका विषयमा छलफल गरिने बताएको छ । पछिल्यो समय पार्टीमा विवाद बढ्दै जाँदा ओलीले महाधिवेशन केन्द्रित गतिविधि गरिरहेका छन् । त्यहिअनुसार पार्टीको केन्द्रीय कमिटी बैठक बोलाएको बुझिएको छ ।

उता वरिष्ठ नेता माधवकुमार नेपाल समूहले भने देशभर समानान्तर संगठन निर्माण गरिरहेको छ । ओलीले पार्टीको नियम विपरित गतिविधि गरेको भन्दै वरिष्ठ नेता नेपाल, उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई ६ महिना निलम्बनको कारबाही गरेका छन् ।

यसअघि गएको चैत ७ मा बसेको एमाले केन्द्रीय कमिटी बैठकले कार्यविभाजनको प्रस्ताव तयार पार्न उपमहासचिव विष्णुप्रसाद पौडेल, सचिव प्रदीप ज्ञवाली र नेता टोपबहादुर रायमाझीलाई जिम्मेवारी दिएको थियो । आगामी बैठकमा नेताहरुको कार्यविभाजनको प्रस्ताव पेश गर्ने तयारी रहेको छ ।