खनाल-नेपालको बेग्लै सर्कुलर

३० चैत, काठमाडौं । नेकपा एमाले भित्र दुई पक्षबीच बढेको अविश्वासले ठूलै संकट सामना गर्नुपर्ने ठहर असन्तुष्ट पक्षले गरेको छ । पार्टी अध्यक्षसमेत रहेका प्रधानमन्त्री केपी ओलीको असहिष्णु चरित्र र व्यावहारले समग्र पार्टी नै विसर्जनको दिशामा धकेलिएको ठहर गर्दै झलनाथ खनाल – माधवकुमार नेपाल पक्षले बेग्लै राजनीतिक प्रस्ताव तयार गरेको छ ।

पार्टी विघटन र विसर्जनको बाटोमा लगेको भन्दै यो समूहले ओली पक्षको चर्काे आलोचनासमेत गरेको छ । खनाल–नेपाल पक्षले तयार गरेको राजनीतिक प्रस्तावको आधार भने चैत ४ र ५ गते गरिएको कार्यकर्ता भेलाकै निश्कर्ष रहेको छ ।केन्द्रीय कमिटीका तर्फबाट नेता नेपालद्वारा प्रस्तुत भई पारित उक्त प्रस्तावमा ओलीले कम्युनिष्ट आन्दोलनलाई विभाजन र विसर्जनको बाटोमा लैजान खोजेको उल्लेख छ ।

पारित प्रस्तावकै आधारमा आजैबाट यो समूहले आफू पक्षीय नेता कार्यकर्ताका लागि आन्तरिक सर्कुलर जारी गरेको छ ।
सर्कुलरमा चैत ४ र ५ को भेलाका निश्कर्षसहित त्यसअघि र पछिका स्थायी कमिटी एवं केन्द्रीय कमिटीका निर्णयसमेत मातहत कमिटीमा प्रेषित गर्न उक्त सर्कुलर जारी गरिएको हो । सर्कुलरमा स्पष्ट भनिएको छ– अबदेखि सम्पूर्ण पार्टी पंक्ति यसै अनुसार परिचालन हुनेछ ।