वैशाख ५ गते कांग्रेस केन्द्रीय कार्यसमितिको बैठक

३० चैत, काठमाडौं । नेपाली कांग्रेसले केन्द्रीय कार्यसमितिको बैठक वैशाख ५ गते बस्ने भएको छ । वरिष्ठ नेता रामचन्द्र पौडेलका भाइको निधनका कारण सोमबारका लागि बोलाइएको बैठक अन्तिम समयमा आएर स्थगित भएको थियो ।

कांग्रेस मुख्यसचिव कृष्णप्रसाद पौडेलले सूचना निकालेर ५ वैशाखका लागि बैठक बोलाइएको जानकारी दिएका हुन् । बैठकमा क्रियाशील सदस्यता वितरण तथा नवीकरणको तथ्यांक केन्द्रमा पठाउने समय थपबारे छलफल हुने बताइएको छ ।

नेता रामचन्द्र पौडेलका माइला भाइ गोविन्दराज पौडेलको निधन भएपछि आज दिउँसो दुई बजेका लागि बोलाइएको बैठक स्थगित गरिएकाे हाे ।

बैठकमा पार्टी महाधिवेशनबारे छलफल गर्ने एजेण्डा थियो । पौडेलका माइला भाइको निधन भएपछि नेता पौडेल अन्तिम संस्कारका लागि चितवन गएका छन् ।