क्रान्तिकारी माओवादीले दुई महिना अभियान चलाउने

३१ चैत, काठमाडौं । मोहन वैद्य (किरण) नेतृत्वको नेकपा (क्रान्तिकारी माओवादी)ले आगामी बैशाख र जेठ महिनामा संगठन तथा संघर्षसम्बन्धी अभियान चलाउने भएको छ । चैत २८ र २९ गते बसेको पार्टीको पोलिटव्युरो बैठकले उक्त निर्णय गरेको हो ।

यस्तै बैठकमा राष्ट्रिय स्वाधिनताको रक्षा, जनजीविकाका समस्याको समाधान, महँगी लगायतका मुद्दामा पनि संघर्षका कार्यक्रम गर्ने निर्णय गरेको छ ।   पार्टीका महासचिव किरणद्वारा जारी विज्ञप्तिमा संयुक्त मोर्चा तथा कार्यगत एकतामा सम्मिलित राजनीतिक दलहरुबाट संघर्षका कार्यक्रम संचालनका लागि पहल गर्ने उल्लेख गरिएको छ ।

यस्तै बैठकले संयुक्त मोर्चा तथा कार्यगत एकतामा सम्मिलित राजनीतिक दलहरूद्वारा सङ्घर्षका कार्यक्रमहरु सञ्चालन गर्नका लागि आवश्यक पहल गर्ने,सबै प्रदेशहरूमा पार्टीको प्रशिक्षण कार्यक्रम सञ्चालन गर्ने, एमसीसीको विरोध गर्नेलगायतका निर्णय पनि गरेको छ ।