इतिहासमा पहिलोपटक रोयटर्समा महिला प्रधान सम्पादक

३१ चैत, एजेन्सी ।  अन्तर्राष्ट्रिय समाचार एजेन्सी रोयटर्सले आफ्नो १७० वर्षको इतिहासमा पहिलोपटक महिला प्रधान सम्पादक नियुक्त गरेको छ । बेलायतको लण्डन मुख्यालय रहेको समाचार संस्था रोयटर्सले आफ्ना शीर्ष सम्पादक मध्येबाट रोयटर्सले इटालियन नागरिक ४७ वर्षीया अलेसान्द्रा गलोनीलाई भावी प्रधान सम्पादकका रुपमा चयन गरेको हो।

अहिले रोयटर्सको प्रधान सम्पादक स्टेफेन जे अड्लर छन् । उनी पछिल्लो एक दशकयता रोयटर्सको प्रधानसम्पादकको रुपमा छन् । उनको कार्याकालमा रोयटर्सले सयौं अवार्डहरु पाएको छ ।

चारओटा भाषामा दक्ष रहेकी गालोनीसँग रोयटर्स र वाल स्ट्रिट जर्नलमा बिजनेस तथा राजनीतिक समाचार लेखेको अनुभव छ । रोयटर्समा विश्वभर दुई हजार ४५० पत्रकार छन् । यो विश्वकै सबैभन्दा ठूलो समाचार एजेन्सीमध्येको एक हो ।

सन् २००८ यता रोयटर्स न्युज थमसन रोयटर्स कम्पनीको एक भागको रुपमा रहँदै आएको छ । थमसन रोयटर्स कम्पनीको समग्र आम्दानीमा रोयटर्स न्युजको करिब १० प्रतिशतको हिस्सा रहने गरेको छ ।

थमसन रोयटर्स कम्पनीका सीईओ स्टिभ हस्करले विज्ञप्ति जारी गर्दै कम्पनी रोयटर्स न्युजको भविष्य राम्रो बनाउन प्रतिबद्ध रहेको बताए । उनले स्वतन्त्र, निष्पक्ष र विश्वव्यापी पत्रकारितामा अडिग रहने बताएका छन् ।