लकडाउन बाहेकका विकल्प खोज्न सरकारलाई कांग्रेसको आग्रह

३१ चैत, काठमाडौं । कोरोना भाइरसको दोस्रो लहर रोक्न ८ काम तत्काल सुरु गर्न नेपाली कांग्रेसले आग्रह गरेको छ । कांग्रेसको कोभिड-१९ अनुगमन समितिले अब फेरि मुलुकले लकडाउन धान्‍न नसक्ने भन्दै स्वास्थ्य सुरक्षा अपनाउन र लकडाउनबाहेकका अरु विकल्प खोज्न कांग्रेसले सरकारलाई आग्रह गरेको  हाे ।

कांग्रेसको कोभिड अनुगमन समितिद्वारा जारी विज्ञप्तिमा ‘देशले फेरि लकडाउनको अवस्था धान्‍न सक्दैन । यस परिस्थितिमा हरेक व्यक्तिले मास्क अनिवार्य लगाउने र भौतिक दुरीमा जोड दिने व्यवस्थालाई कार्यान्वयन गर्न सरकारसँग माग गर्दछ,’ उल्लेख छ ।

‘यस परिस्थितिमा हरेक व्यक्तिले मास्क अनिवार्य लगाउने र भौतिक दुरीमा जोड दिने व्यवस्थालाई कार्यान्वयन गर्न सरकारसँग माग गर्दछ’ अनुगमन समितिका संयोजक डा. प्रकाशशरण महतले भनेका छन्, ‘कार्यालय तथा अन्य कार्यस्थलमा स्वास्थ्य मापदण्ड सुनिश्चित गर्ने र अनुगमनलाई मजवुत गर्न समेत माग गर्दछौं ।’

विश्‍वका अन्य देशहरूमा देखिएका कोभिड-१९ को नयाँ भेरियन्ट नेपालमा प्रवेश गर्ने सम्भावनाप्रति सरकार उदासिन भएका कारण अहिले फेरि संक्रमण फैलदो अवस्थामा पुगेको समितिले बताएको छ ।

स्वास्थ्यकमीलाई दिने घोषणा गरेको जोखिम भत्ता उपलब्ध गराउन, तत्काल प्राविधिक स्वास्थ्य सचिवको व्यवस्था सुनिश्चित गर्न र कोभिडको रोकथाम र उपचारसम्बन्धमा कुरा मात्र गर्ने काम नगर्ने प्रवृत्ति छोड्न सरकारलाई काग्रेसले आग्रह गरेको छ ।