१५ वर्षीया सालीलाई जबरजस्ती करणी गर्ने भेनाजु जेल चलान

१ वैशाख, काठमाडौं । १५ वर्षीया सालीलाई जबरजस्ती करणी गर्ने भेनाजु जेल चलान भएका छन् ।  जिल्ला अदालत, ललितपुरको आदेशपछि १५ वर्षीया बालिकालाई जबरजस्ती करणी गर्ने आरोपी जेल चलान भएका हुन् ।

ललितपुरको बाग्मती गाउँपालिका ७, गिम्दीमा १५ वर्षीया बालिकालाई जबरजस्ती करणी गरेको अभियोगमा लागेका शिक्षक पुर्पक्षका लागि थुनामा गएकाे बताइएकाे छ । जेल चलान भएका उनी पीडितको भिनाजु नाता पर्ने हुन् ।

अदालतको आदेशपछि उनलाई नख्खु कारागार चलान गरिएको छ । पीडित किशोरीले दुई महिनाको गर्भवती भएपछि गिम्दी बाल क्लब सञ्जालका साथीहरुलाई खबर गरेकी थिइन् । त्यसपछि यो घटना प्रहरीसम्म पुगेको थियो ।

प्रहरीले पीडकलाई पक्राउ गरे पनि जाहेरी नपर्दा अभद्र व्यवहारको कसूरमा म्याद थप गरिएको थियो । पछि सिविनको बाल हेल्पलाइनले पीडितको तर्फबाट प्रहरीमा जबरजस्तीकरणीको कसूरमा जाहेरी दिएको थियो । परिवारको दबाबका कारण उनले किटानी जाहेरी दिन मानेकी थिइनन् र आफूलाई केही पनि नभएको दाबी गरेकी थिइन् ।