ओलीले प्रधानमन्त्री हुने वैधानिकता गुमाए : नेता सिंह

१ वैशाख, काठमाडौं । नेपाली कांग्रेसका नेता प्रकाशमान सिंहले केपी ओली नेतृत्वको सरकारले लोकतन्त्र र संविधान नै धरापमा पारेको बताएका छन् । कांग्रेस चितवन खैरहनी नगर समितिले बुधबार आयोजना गरेको शुभकामना आदान-प्रदान कार्यक्रमा बोल्दै नेता सिंहले संविधान, लोकतन्त्र र संघीयता जोगाउन कांग्रेसको नेतृत्वको सरकार आवश्यक रहेको बताए ।

‘देशमा सरकार छ कि छैन, भनेर खोज्‍नु पर्ने अवस्था छ,’ उनले भने, ‘यो सरकार भ्रष्टाचारमा चुर्लुम्म डुबेको छ । ओलीले नैतिक, राजनैतिक तवरले प्रधानमन्त्री हुने वैधानिकता गुमाए । ओलीले तत्काल राजीनामा दिनु पर्छ ।’

सिंहले नेपालमा लोकतन्त्र जोगाउन कांग्रेस मजबुत हुनुपर्ने भन्दै आगामी महाधिवेशन समयमै हुनुपर्ने बताए । ‘कांग्रेसले देश र जनतालाई संकट पर्दा सधै महत्वपुर्ण भुमिका खेल्ने गरेको छ । नेपाली जनताको पार्टी कांग्रेस हो । राणा शासन हटाउने देखि प्रजातन्त्र स्थापना र संविधान निमार्णमा कांग्रेसले महन्वपुर्ण भुमिका खेल्ने गरेको छ,’उनको भनाइ थियो ।

सरकारले समृद्ध नेपाल सुखी नेपाली नारामा मात्र सिमित गरेको भन्दै प्रदेश सरकार र स्थानीय सरकारको अधिकार खोस्‍ने प्रयास गरिरहेको उनको दाबी छ । लोकतन्त्र भए मात्र जनताले आफ्नो शासनको महसुस गर्ने हुदाँ अहिले संविधान र लोकतन्त्र धरापमा परेकाले कांग्रेस बाध्य भएर सरकार निमार्णमा अग्रसरता लिएको बताए ।