व्यक्तिगत घटना दर्ता नगर्नेलाई टोखा नगरपालिकाले जरिवाना गर्ने

१ बैशाख, काठमाडौं । टोखा नगरपालिकाले व्यक्तिगत घटना घटेको ३५ दिनभित्र घटना दर्ता नगराउने नगरपालिकावासीलाई जरिवाना गर्ने भएको छ ।

आजबाट टोखा नगरपालिकामा व्यक्तिगत घटना दर्ता अभियान शुरु भएको र अनिर्वाय रुपमा नगरपालिकामा दर्ता हुनुपर्ने विभिन्न व्यक्तिगत घटनाहरु दर्ता नगरी बसेमा नगरवासीलाई जरिवाना गरिने बताइएको छ ।

काठमाडौंको उत्तरी क्षेत्रमा रहेको टोखाले राष्ट्रिय परिचयपत्र तथा पञ्जिकरण विभागको समन्वयमा आजदेखि व्यक्तिगत घटना दर्ता अभियान शुरु गरेको हो ।

नगरपालिकाका प्रमुख प्रकाश अधिकारीले बैशाख १ देखि १६ गतेसम्म टोखा नगरपालिकाभर व्यक्तिगत घटना दर्ता अभियान सञ्चालन गरिएको जानकारी दिए । “घटना दर्ता गर्न बाँकी रहेका टोखावासी आफ्नो वडा कार्यालयमा उपस्थित भई जन्म, मृत्यु, विवाह, सम्बन्ध विच्छेद र बसाइँसराइ अनिवार्यरुपमा दर्ता गर्नुहोला”, नगर प्रमुख अधिकारीले भने । टोखा नगरपालिकामा ११ वडा रहेका छन् ।