टुक्रे आयोजनामा बजेट विनियोजन नगर्न संघ र प्रदेशलाई स्थानीय तहको आग्रह

२ बैशाख, काठमाडौं । टुक्रे आयोजनामा बजेट विनियोजन नगर्न संघ र प्रदेशलाई स्थानीय तहले आग्रह गरेका छन् । संघद्वारा आयोजित योजनाहरु कम्तीमा पनि रु २० करोड र प्रदेशका योजनाहरु रु १० करोडभन्दा माथिका हुनुपर्नेमा स्थानीय तहका प्रमुखहरुले जोड दिएका छन् ।

निर्वाचन क्षेत्र सुधार कार्यक्रमहरुलाई पालिका अन्तरगत पालिकाको योजनामुताविक गर्नु पर्ने र साना योजनाहरुमा प्रत्यक्षरूपमा पालिकामै बजेट पठाउने व्यवस्था मिलाउन उनिहरुले माग रहेको  छ। पोखरामा स्थानीय तहका प्रमुखहरुको प्रथम राष्ट्रिय मेयर सम्मेलन पछि जारी १६ बुँदे पोखरा घोषणापत्र यस्तो माग समेटिएको हो ।

स्थानीय तहमा भोगाई,सिकाइहरु, समस्याहरु र आगामी योजनाहरुको बारेमा छलफल गरी आगामी दिनमा के कस्ता रणनीतिहरु अपनाउने भन्ने विषयमा घोषणापत्र जारी गरिएको पोखरा महानगर प्रमुख मानबहादुर जिसीले जानकारी दिएका छन् ।

‘समृद्ध नेपाल र सुखी नेपाली’को आधारशीला तयार गर्ने आधिकारीक निकाय स्थानीय तहहरु भएकाले पालिकाहरुको आपसी सहकार्य, समन्वयात्मक अन्तर आबद्धतालाई नियमित गर्दै सहकार्य गर्न अवसरहरु सिर्जना गर्दै अगाडि बढ्ने प्रतिबद्धता सम्मेलनबाट लिइएको छ ।

उहाँका अनुसार सम्मेलनबाट जारी घोषणापत्रलाई देशका ७५३ वटै पालिकामा इमेलमार्फत पठाएर सुझाव सङ्कलन गरी यही वैशाख १० गते अन्तिम रूप दिइने छ । महानगरको चालु वर्षकोे वार्षिक कार्यक्रममा मेयर सम्मेलन आयोजना गरिने कार्यक्रम राखेर आयोजना गरिएको प्रमुख जिसीले जानकारी दिनुभयो ।

‘समृद्ध नेपाल र सुखी नेपाली’को आधारशीला तयार गर्ने आधिकारीक निकाय स्थानीय तहहरु भएकाले पालिकाहरुको आपसी सहकार्य, समन्वयात्मक अन्तर आबद्धतालाई नियमित गर्दै सहकार्य गर्न अवसरहरु सिर्जना गर्दै अगाडि बढ्ने प्रतिबद्धता सम्मेलनबाट लिइएको छ ।

सम्मेलनले स्थानीय विकासका मुद्दाहरुलाई प्राथामिकीकरण गरी नागरिकको गुणस्तरीय, आत्म सम्मानित र पहिचानसहितको  जीवन सुनिश्चित गर्न नीति तथा कार्यक्रमहरु तर्जुमा गरी कार्यान्वयन गर्न जोड दिएको छ । पोखरा महानगरपालिकाको आयोजनामा चैत ३१ र वैशाख १ गते गरी दुई दिने सम्मेलनको आयोजना गरिएको थियो ।