ओली अहंकारीः भूषाल

२ वैशाख, बुटवल । नेकपा एमालेबाट ६ महिनाका लागि निलम्बित उपमहासचिव घनश्याम भूषालले अहिलेको राजनीतिक अस्थिरता र अराजकताको जड केपी ओली रहेको दाबा गरेका छन् । खनाल–नेपाल निकट प्रेस चौतारीले आज आयोजना गरेको पत्रकार सम्मेलनमा बोल्दै नेता भूषालले भने– अहिलेको विकृतिको कारक नै ओली हुन् । उनले वामपन्थी आन्दोलनलाई विसर्जनतिर लग्दैछन्,त्यसलाई जोगाउन हामीहरु समानान्तर कमिटी गठन गरिरहेका छौं ।

ओलीले अहिले पनि अहंकार र दम्भ छाड्ने हो भने वाम एकता सम्भव रहेको चर्चा गर्दै उनले तर ओलीमा त्यो धैर्यता र साहस नभएकाले नै अहिलेको अवस्था आएको बताए । ओलीजीमा सहिष्णुता र भाइचारा भन्ने कुनै संवेदना नै छैन, त्यसैले अब वाध्य भएर आफूहरु वाम आन्दोलन जोगाउन समानान्तर कमिटी बनाउनेतिर लागेको उनको तर्क छ ।

सत्ता उन्माद र अहंकारले गर्दा ओलीमा दम्भ बढेको आरोप लगाउँदै नेता भूषालले तर समयक्रममा ओली धुलिसात हुने ठोकुवा गरे । अहिले त सत्ता होला, केही मानिस लोभलालचमा उनका पछि दगुरेका होलान्,तर सधैं न उनी सत्तामा रहने छन्, न उनका पछि कुद्नेहरु सधैं एकनास रहनेवाला छन् – नेता भूषालले भने ।

सरकार बनाउन सघाउने वाम शक्तिलाई चिढ्याएर आफ्नै दलका नेतामाथि कारबाहीको डण्डा चलाएर भष्मासुरे प्रवृत्ति अपनाएको भन्दै पार्टी अध्यक्ष ओलीको यही तरिकाले उनी धुलिसात हुने दावी गरे ।