दिल्लीमा साप्ताहिक विदाका दिन कर्फ्यू लगाइने

२ वैशाख, एजेन्सी । भारतमा गत २४ घण्टामा थप २ लाख भन्दा बढी व्यक्तिमा कोरोना भाइरसको संक्रमण देखिएपछि दिल्लीमा सप्ताहन्तमा कर्फ्यू लगाइने भएको छ।

दिल्लीका मुख्यमन्त्री अरविन्द केजरीवालले बिहीबार साप्ताहिक विदाका दिन कर्फ्यू लगाउने घोषणा गरेको हुन्। पत्रकारहरूसँग कुराकानी गर्दै दिल्लीमा जारी कोरोना भाइरस संक्रमणको चौथो लहर धेरै नै गम्भीर भइरहेको केजरीवालले बताए।

कोरोना भाइरसको संक्रमण दिनप्रति दिन बढ्दै गएको हुँदा त्यसलाई मध्यनजरमा राखेर कडा प्रतिबन्ध लगाउन बाध्य भएको उनले बताए।मुख्यमन्त्री केजरीवालले दिल्लीवासीलाई कोभिड बेडहरूको कमी नभएको पनि आश्वासन दिए। उनले दिल्लीमा आजमात्रै ५ हजार बेडहरू उपलब्ध भएको र त्यसलाई अझै बढाउने कोशिस गरिरहेको बताए।