वीरगञ्जमा ५१ वर्षीया संक्रमित महिलाको मृत्यु

५ वैशाख, वीरगञ्ज । वीरगञ्जमा ५१ वर्षीया कोरोना संक्रमित महिलाको मृत्यु भएको छ । नारायणी अस्पतालको आइसोलेसन वार्डमा उपचारको क्रममा वीरगञ्ज–१६ नगवा बस्ने महिलाको मृत्यु भएको हो ।

ज्वरो, खोकी लागेपछि उनलाई शनिबार उपचारका लागि नारायणी अस्पताल ल्याइएको थियो । उनको आजै दिउँसो करिव पौने २ बजेतिर मृत्यु भएको अस्पतालले जनाएको छ ।

उपचारको क्रममा उनलाई निमोनिया भइसकेको पत्ता लागेको थियो । नारायणी अस्पतालकै प्रयोगशालामा गरिएको पीसीआर परीक्षण रिपोर्ट पनि पोजेटिभ थियो ।