ओली पक्षकाे केन्द्रीय कमिटी बैठक सोमबार बस्ने

५ वैशाख, काठमाडौं । नेकपा एमाले अध्यक्ष एव प्रधानमन्त्री केपी ओली पक्ष केन्द्रीय कमिटी बैठक सोमबार बस्ने भएको छ । पार्टीभित्र चर्किरहेको द्वन्द्वकाबीच भोली प्रधानमन्त्रीको सरकारी निवास बालुवाटरमा बैठक बस्न लागेको हो ।

बैठक दिउँसो १ बजे बस्ने छ । बैठकमा जिल्लाहरुका इन्चार्ज तोक्नेलगायत नेताहरुको कार्यविभाजनको एजेण्डा बनेको छ। यस्तै उपनिर्वाचनको तयारीका मामिलामा पनि छलफल हुने बुझिएको छ ।

खासगरी एमालेमा प्रवेश गरेर सांसद पद खारेजीमा परेका रामबहादुर थापा ‘बादल’ को ठाउँमा ३५ दिनभित्र उपनिर्वाचन हुने कानुनी व्यवस्था छ। बैठकमा ओली पक्षले माधवकुमार नेपाल र झलनाथ खनाल पक्षको सहभागिता बिना तोकेको महाधिवेशनको तयारीका विषयमा पनि छलफल गर्ने बताइएको छ ।

बैठकमा कर्णाली प्रदेशमा ‘फ्लोर क्रस’ गर्ने नेपालखनाल पक्षका सांसद प्रकाश ज्वालालाई पार्टी सदस्यता र सांसदबाट हटाउने निर्णय पनि गर्ने बालुवाटार स्रोतले बताएको छ । ज्वालासहित नन्दसिंह बुढा, कुर्मराज शाही, अम्मरबहादुर थापाले शुक्रबार वैशाख ४ गते ‘फ्लोर क्रस गरेका थिए।