फन्डको अध्यक्षमा महतो र सीईओमा भट्टराई नियुक्त

५ वैशाख, काठमाडौं । गैरआवासीय नेपालीहरुको लगानीमा स्थापना हुन लागेको एनआरएन नेपाल डेभलपमेन्ट फन्डको अध्यक्षमा उपेन्द्र महतो चयन भएका छन् भने प्रमुख कार्यकारी अधिकृत (सीइओ) मा अनलराज भट्टराई नियुक्त भएका छन् ।

कम्पनी रजिष्ट्रारको कार्यालयमा फन्ड दर्ता भएसँगै सरकारको ५० करोड लगानी रहने सो फन्डमा दुई अर्बको प्रतिबद्धता आइसकेको एनआरएनएका अध्यक्ष कुमार पन्तले जनाएका छन् ।

कम्तीमा १० अर्बको कोष बनाई नेपालको उद्यम, व्यवसाय र पूर्वाधारका क्षेत्रमा लगानी गर्ने कम्पनीको मुख्य उद्देश्य रहेको पनि पन्तले जानकारी दिएका छन् ।

गैरआवासीय नेपाली संघका संस्थापक अध्यक्षसमेत रहेका महतोको नेतृत्वमा अगाडि बढेको नेपालको पूर्वाधार क्षेत्रमा लगानी गर्ने उद्देश्यले १० अर्ब रुपैयाँको ‘एनआरएन नेपाल डेभलपमेन्ट फन्ड’ चैत १७ गते कम्पनी रजिष्ट्रारको कार्यालयमा दर्ता भएको थियो ।

संसारभर छरिएर रहेका श्रमिकहरु, व्यवसायी, विभिन्न पेशामा आबद्ध पेशाकर्मी लगायतले नेपालको विकास र समृद्धिमा सकेको लगानी गरी आर्थिक लाभ लिन सक्ने कम्पनीले जनाएको छ ।