ओलीलाई बैठक रोक्न बोहोराको ध्यानाकर्षण पत्र !

५ वैशाख, काठमाडौं । प्रधानमन्त्री केपी ओलीले सोमबार बोलाएको बैठक रोक्न नेकपा एमाले केन्द्रीय अनुशासन आयोगका प्रमुख अमृत कुमार बोहोराले आग्रह गरेका छन् ।

आइतबार एक वक्तव्य जारी गर्दै बोहोराले पार्टीभित्रको बिग्रहको स्थितिलाई सुधार नगरी पार्टी अध्यक्ष एवं प्रधानमन्त्री ओलीले भोली सोमबार महाधिवेशन आयोजक कमिटी भन्दै बैठक बोलाउनुले स्थितिलाई थप असहज बनाउने काम गरेको निष्कर्ष निकालेका छन्।

सोमबार ओली निकट महासचिव ईश्वर पोखरेलले बैठकका लागि एजेण्डासमेत तयार गरि केन्द्रीय सदस्यलाई निम्तो समेत पठाइसकेको अवस्थामा उक्त बैठक रोक्न बोहोराले आग्रह गरेका छन्।

पार्टीलाई एकतावद्ध बनाउने विशेष ध्यानाकर्षण शीर्षकमा पत्र लेखेर बोहोराले भनेका छन्, ‘उत्तेजना, आवेग र अभिमान हावी भएर कुनै पनि निर्णय गर्नुहुँदैन। पार्टीमा संयम, धैर्यता र सुझबुझ राखेर निर्णय गर्नुपर्छ।’