त्रिकोणात्मक टी–२० सिरिज : नेदरल्याण्डस्द्वारा मलेशिया पराजित

५ वैशाख, काठमाडौं । त्रिकोणात्मक टी–२० सिरिजमा नेदरल्याण्ड्सले मलेसियालाई पराजित गरेको छ । कीर्तिपुर त्रिवि क्रिकेट मैदानमा आज भएको खेलमा नेदरल्याण्ड्सले मलेसियालाई १५ रनले पराजित गरेको हो ।

टस जितेर पहिला ब्याटिङ गरेको नेदरल्याण्ड्सले निर्धारित २० ओभरमा दुई विकेट गुमाएर १९१ रन बनायो । एक सय ९२ रनको विजय लक्ष्य पछ्याउने क्रममा मलेसियाले आठ विकेट गुमाउँदै १७६ रन मात्र बनायो ।

नेदरल्याण्ड्सको लागि म्याक्स ओडाउडले शतकीय पारी खेले । उनले ७३ बलमा अविजित १३३ रन बनाए । यसक्रममा उहाँले ६ छक्का र १५ चौका प्रहार गरे । यस्तै कप्तान बेन कुपरले २० तथा स्कोट इडवार्डले ३१ रन बनाए । बलिङतर्फ मलेशियाका लागि पवनदीप सिंह र अनवर अहमदले एक/एक विकेट लिए।

जवाफी ब्याटिङमा उत्रेको मलेसियाको खराब सुरुवात रह्यो । मलेसियाले २० रन बनाउँदा तीन विकेट गुमाएको थियो । मलेसियाका लागि सरभिन मुनिडेले २८, विरनदिप सिंह ८७, अनिमुद्दिन राम्लेले २६ तथा सर्भिन मुनिन्डेले २८ रन बनाए ।

बलिङतर्फ नेदरल्याण्ड्सका लागि आर्यन दत्त, बास डी लिडी र सवास्चियन ब्राटले दुई दुई विकेट लिनुभयो । प्रतियोगितामा नेपालले सोमबार मलेसियासँग आफ्नो दोस्रो खेल खेल्ने छ । पहिलो खेलमा शनिबार नेपालले नेदरल्यान्डलाई नौ विकेटले पराजित गरेको थियो । तीन देश सम्मिलित त्रिकोणात्मक टी–२० सिरिजमा नेपाल शीर्ष स्थानमा नेदरल्याण्ड्स दोस्रो तथा मलेसिया पुछारमा छ ।