आन्तरिक उडानमा हवाइ भाडा बढ्यो

७ वैशाख, काठमाडौं । आन्तरिक वायुसेवा प्रदायकहरूले हवाई शुल्क बढाएका छन् । नेपाल आयल निगमले हवाई इन्धनको मूल्य बढाएपछि वायुसेवा प्रदायकहरुले हवाइ भाडा बढाएका हुन । आजदेखि हवाई यात्रुहरूले बढेको भाडादर तिर्नुपर्नेछ ।

निगमले वैशाख ४ गते हवाई इन्धनमा प्रतिलिटर दुई रुपियाँ मूल्य बढाउने निर्णय गरेको थियो । हवाई इन्धनको मूल्यमा हुने घटबढका आधारमा इन्धन शुल्क पनि स्वचालित गर्ने प्रणालीअनुसार शुल्क बढाइएको वायुसेवा सञ्चालक सङ्घ नेपालले जनाएको छ ।

सङ्घका अनुसार इन्धन शुल्क हवाई रुटअनुसार न्यूनतम १० रुपियाँदेखि अधिकतम ८५ रुपियाँसम्म बढेको छ । नियमित रुटतर्फ सबैभन्दा कम काठमाडौँदेखि सिमरा १५ रुपियाँ शुल्क बढेको छ । सबैभन्दा बढी काठमाडौँ–धनगढी रुटमा ८५ रुपियाँ बढेको छ ।