ओलीबिरुद्ध अविश्वास प्रस्तावको तयारी, माओवादी केन्द्रले आजै सर्मथन फिर्ता लिने

७ वैशाख, काठमाडौं । सत्ता गठबन्धनका लागि प्रमुख प्रतिपक्षी दल नेपाली कांग्रेससहित नेकपा माओवादी केन्द्र अग्रसर भएपछि प्रदेश सरकारहरु खल्बलिने क्रम तीब्र भएको छ । तर संघीय सरकार भने अझै टसकाे मस देखिएको छैन् । यद्यपि कांग्रेसले वर्तमान केपी ओली सरकारको विकल्पमा आफ्नो अग्रसरता बढाएको अवस्थाले नयाँ संरचना तयार हुन सक्ने सम्भावना भने देखाएको छ ।

ओलीलाई तत्कालै पदबाट विदाई गर्न सबैभन्दा बढी हतार नेकपा एमालेकै माधवकुमार नेपाल पक्षलाई छ । यसको विश्वासिलो आधार तयार भएपछि नै कांग्रेस सभापति शेरबहादुर देउवा चल्बलाएका थिए ।

ओली सरकारलाई औपचारिक रुपमा माओवादी केन्द्रले दिंदै आएको समर्थन फिर्ता लिएलगत्तै अविश्वास प्रस्ताव दर्ता गर्ने तयारी भएको थियो । यसका लागि माओवादी स्थायी कमिटी बैठक हिजै डाकिएको थियो । नेपाली कांग्रेसले समेत केन्द्रीय कार्य समिति बैठक बोलाएको थियो ।

नयाँ सत्ता समीकरण तयार गर्ने सहमति जुटेको सुइँको पाएका प्रधानमन्त्री ओलीले हिजै संसद अधिवेशन अन्त्य गरिदिएका छन् । त्यसैले हिजोका लागि तय भएको माओवादी स्थायी कमिटी बैठक अन्तिम समयमा स्थगित भएको थियो ।

आजका लागि बैठक सारिएको हो । आज दिउँसो १ बजे माओवादी स्थायी कमिटी बैठक पेरिसडाँडास्थित मुख्यालयमा बस्दैछ । सम्भवतः आजको बैठकले ओली सरकारलाई दिंदै आएको समर्थन औपचारिक रुपमा फिर्ता लिनेछ ।

यस्तो अवस्थामा जनता समाजवादी पार्टीले समेत समर्थन गर्ने विश्वास गठबन्धन दलहरुले गरेका छन् । कदाचित जसपाले समर्थन गरेन भने पनि माधवकुमार नेपाल पक्षले फ्लोर क्रस गरेरै भएपनि ओलीलाई पदमुक्त गरि छाड्ने रणनीति बनाएको स्रोतको भनाई छ ।