पूर्वराजा ज्ञानेन्द्र शाह दम्पतीलाई कोरोना पुष्टि

७ वैशाख, काठमाडौं ।  भारतको हरिद्वारमा आयाेजित कुम्भमेलामा सहभागी भई फर्केका पूर्व राजा ज्ञानेन्द्र र उनकी धर्मपत्नी कोमललाई कोरोना संक्रमण भएको छ । कुम्भ मेलामा सहभागी पूर्व राजदम्पतिले गंगा स्नान गरेका थिए ।

भारतबाट फर्केका ज्ञानेन्द्र दम्पतिले पीसीआर टेस्ट गर्दा पोजेटिभ रिपोर्ट आएको निर्मल निवास निकट स्रोतले बतायो । हाल पूर्व राजदम्पति आइसोलेसनमा रहेका छन् । उनीहरुमा कोरोना संक्रमण पुष्टि भएपनि स्वास्थ अवस्था भने सामान्य रहेको छ ।

अहिले पूर्व राजदम्पतिको कन्ट्याक्ट ट्रेसिङको काम भइरहेको छ । भारत भ्रमणमा रहँदा पूर्व राजदम्पतिले उत्तर प्रदेशका मुख्यमन्त्री योगी आदित्यनाथलाई समेत भेटेका थिए । उनी आफैं कोरोना संक्रमित भएर अहिले आइसोलेसनमा रहेका छन् ।

नयाँ भेरियन्ट फैलिएसँगै संक्रमणको जोखिम झनै बढेको छ। दिनकै हजार बढीको संख्यामा संक्रमित थपिन थालेपछि पछिल्ला दिनमा मृतक संख्या पनि बढ्दो छ । पहिलेको तुलनामा अहिले संक्रमण तीव्र गतिमा फैलिरहेको छ।

यता काठमाडौं उपत्यका पनि काेराेना संक्रमणको उच्च जोखिममा छ। संक्रमितको संख्या यही गतिमा बढ्दै गए केही दिनमा भेन्टिलेटर नपाएर मृत्यु हुने बिरामीकाे संख्या बढ्न सक्ने चिकित्सकहरूले चिन्ता व्यक्त गरेका छन् ।