हुलहुलका बाँदरले मकैबाली सखाप पारेपछि, किसान चिन्तित

७ वैशाख, झापा । घोगा हाल्ने बेलाका मकै बाँदरले भाँच्ने, लुछ्ने, गुभा खाने गरेपछि मेचीनगर नगरपालिका–५ का किसान चिन्तित बनेका छन् । पाँक्न लागेका मकैबारीमा दैनिक हुलहुलका आउने बाँदर पसेर सखाप पार्न थालेपछि किसान चिन्तित हुन थालेका हुन् । दैनिक हुल बाँधेर आउने बाँदरले मकैसँगै घरभित्रको खाद्यान्नसमेत खाइदिएर दुःख दिइरहेको स्थानीय दधिराम बरालले बताए ।

उहाँका अनुसार रातभर नजिकै रहेको टोक्ला बगानमा बस्ने बाँदर उज्यालो हुनसाथ गाउँ पस्ने गरेका छन् । स्थानीय कुकुरसहित बाँदर खेलाउनका लागि दिनभर खेतमै बस्ने गरे पनि बाँदरले उनीहरूको आँखा छलेर पाँक्न लागेको मकै खाइदिएको उनको भनाइ छ । यो क्षेत्रमा विगत तीन वर्षदेखि बाँदरको आतङ्क छ ।

अन्य समय कम आउने बाँदर मकै पाकेपछि गाउँमै दिन बिताउन थालेका छन् । पहिला थोरै सङ्ख्यामा आउने बाँदर यतिबेला बच्चासहित लिएर ठूलो समूहमा आउन गरेको अर्का किसान अमर गौतमको भनाइ छ । उनले एक्लै खेलाउँदा बाँदरले नै आक्रमण गर्ने डरले यतिबेला समूह नै बनाएर बाँदर खेदाउन थालेको बताए ।

“बाली लगाएर के गर्नु घरमा भित्र्याउनै पाइँदैन”, उनले भने, “धान रोप्यो धानमै किराको प्रकोप, मकै रोप्यो सुँगा र बाँदरलाई नै पुग्दैन खै के खाने हो अब ।” सोही वडाका कुलबहादुर बुढाथोकीले बाँदरको आतङ्ककै कारण यस वर्ष मकै बाली नलगाएको बताए । अघिल्लो वर्ष लगाएको मकै बाँदरले सबै नष्ट गरिदिएपछि यस वर्ष हाइब्रिड जातको मकै नलगाएको उनले बताए ।

यतिबेला मकै मात्र होइन घरमा पकाएको खाना नै बाँदरले खाइदिने गरेको उनीहरूको गुनासो छ । “बाँदरले गरिखान नदिने भो, बाली लगायो भित्र्याउन पाइँदैन”, उनले भने, “यस्तै अवस्था रहिरहे अब बाली कसरी जोगाउने ? मकै रोप्यो बाँदरलाई नै ठिक्क हुने भो आफू त गोठालो मात्र भइयो ।” बाँदरले मकैबाली मात्र नभएर फल तथा सब्जी खेतीमा समेत क्षति पु¥याउँदै आएको छ । लौकाको चिचिला, फर्सीका गट्टा तथा विभिन्न फलसमेत नष्ट गर्न थालेको उनको भनाइ छ । समयमै स्थानीय सरकारले बाँदर व्यवस्थापनबारे चासो नदेखाए किसानको मकै खेतीप्रति उत्साह नै घट्ने निश्चित रहेको उनको भनाइ छ ।